ھدایت الرحمان بلوچ: لوٹ منّگ نه‌بوت اَنت گُڑا زھرشانی کن ایں

بلوچستان ءِ تیاب‌دپی شھر گوادر ءَ یکشمبے ءِ روچ ءَ ملا فاضل چوک ءِ سر ءَ گوادر ءَ ھک دے تھریک ءِ سروک مولوی ھدایت الرحمان بلوچ ءُ دگراں وتی لوٹ زرتگ ءُ گپءُتران کنان ءَ گْوشتگ که پانزدہ روچ ءَ لوٹ منّگ نه‌بوت اَنت گُڑا شھر یک بلاھیں زھرشانی یے کنگ بیت.

اے مچّی یے وھد ءَ شھریانی مزنیں کچے ءَ ساری بوتگ اَنت.

آھاں گْوشتگ که ھکومت ءَ مارا باور کنائینتگ که زوت لوٹ منّگ بنت بلے تنی وھدے یک لوٹے ءَ اَبید آ دگہ چاردھیں لوٹ ءِ سر ءَ دلگوش کنگ پش کپتگ اَنت.

آھاں گْوشتگ که اے جُھد برجاہ ءَ دارگ بیت یک چینی یے ھاتر ءَ مئے دریاورد تیاب ءَ روگ ءَ نه اوشت اَنت بلکیں چینیاں اوشتگ لوٹ اِیت.

زانگ به بیت گوستگیں ماہ ءَ گوادر ءَ یک مزنیں راجی مُچی ءَ چه پانزدہ لوٹ ایر کنگ بوتگ ءُ مروچگیں روچ ءَ صوبائی ھکومت ءَ دیِگ بوتگ آیانی لوٹ منّگ به بنت بلے مروچی مُچی ءِ ته ءَ گوادر ءَ ھک دے تھریک ءِ راھشوناں ھکومت ءَ گیشیں پانزدہ روچ ءِ وھد داتگ ءُ گوشتگ کہ اشی ءَ چہ پد یک بلاھیں رھرشانی یے کنگ بیت.

آھاں گْوشتگ کہ یکرندے پد ءَ لوٹ ایر کتگ اَنت که تیاب ءَ ٹرالر مافیاں چه ءَ ساپ کنگ به بیت ءُ فشریز آرڈینس 1986 ءِ سر ءَ دلگوش دیگ به بیت.

دریاورداں آجوئی ھمراھی ءَ تیاب روگ بل اَنت ءُ انٹری ٹوکن ءُ وی آئی پیز نام سر ءَ دریاورداں زلیل کنگ ءَ بند به کن اَنت.

آھاں گْوشتگ که پھازوک نام سر ءَ راج ءَ زلیل کنگ ءَ بند کنگ به بیت. بےمکسدیں چیک پوسٹاں چست به کن اَنت ءُ گوادر، شال ءُ کراچی ءَ رؤکیں شھدگ ءِ سر ءَ بےمکسدیں چیک پوسٹاں چست به کن اَنت.

آھاں گْوشتگ که ایران سیمسربندی ءُ ورگ ءُ توژگی چیزانی سر ءَ پابندیاں ھلاس به کن اَنت. ٹوکن سسٹم ءِ ھلاسی ءُ ایپ سی دزمانجی ءَ ھلاس کنگ به بیت.

مروچی گوادر ءِ مُچی ءَ گوادر ھک دے تھریک ءَ راھشوناں وتی لوٹ دوبر ایر کتگ اَنت ءُ ھکومت ءَ داں پانزدہ نومبر ءَ موہ داتگ.

سرچمگ: دی بلوچستان پوسٹ