این ڈی پی: ھوشاب وئیل ءِ کھول لوٹ ءِ سر ءَ چست ءُ ایر نہ‌کنگ ھکومت ءِ بےوسی مسال اِنت

نیشنل ڈیموکریٹک پارٹی ءِ بُنجاھی جارکش ءَ وتی درشان ءِ تہ ءَ گْوشتگ کہ چینچو روچ اِنت دو شال ءِ دگانی سر ءَ ھک ءُ انساپ ءِ وداریگ اَنت. شال ءَ اے سارتی ءَ کماش، ورنا، چُک ءُ زالبول زھرشانی ءَ نشتگ اَنت بلے ھکومت ءِ تہ ءَ ھستیں وزیر ءُ گزیرانی گوشاں مور ئِے ھم نہ وارتگ.

جارکش وتی درشان ءِ تہ ءَ گْوشتگ کہ ھوشاب کھول ءِ لوٹ ءِ سر ءَ انگت ھکومت ءِ گپ دیم نیاھگ اے درگت ءَ آئی نا اُمیتی ءَ پدر کنت.

جارکش ءَ گْوشتگ کہ دوئیں لاشانی جاور شر نہ‌اَنت بلے ھزارانی زندگیں انساناں اے وڑیں وئیلاں چہ رکینگ ءِ ھاتر ءَ آ پیر ءُ آجزیں کماش وتی جگرگوشاں کل ءُ کسارت نہ کنگ ءَ اِنت، ھکومت ءَ لوٹ اِیت آ زوت ءَ آیانی لوٹانی سرجم کنگ ءَ وتی گپاں دیم ءَ بیار اِیت.

جارکش ءَ گْوشتگ کہ دردناکیں وئیل ءِ بگیری ءَ سیاسیی گل ءُ پارٹیاں، انسانی ھکانی ادارھاں ھوار رسانکدرے ادارہ وتی زمہ‌واری ءَ پیلو کنگ ءَ پُشتکنز اَنت اشانی بےتواری راجدپتر ءَ یات کنگ بیت.

آھاں گْوشتگ کہ نیشنل ڈیموکریٹک پارٹی ھوشاب وئیل کھول ءِ بانداتگیں زھرشانی ھوار دیمتر ءَ پالیسانی رِد ءَ ایر کتگیں لوٹانی منوگر بہ‌ئے ایں ءُ سکّیانی وھد ءَ گل داں گُڈی وھد ءَ آیانی ھمکوپگ بیت.

سرچمگ: دی بلوچستان پسٹ