کیچ: لشکریانی بمب شانگ ءَ یک گونڈل ءِ نمیران، یکے ٹپی

بلوچستان ءِ دمگ کیچ ءِ ھوشاب ھنکین ءَ یک شمبے ءِ سھب ءَ پاکستانی لکشریانی مارٹر بمب بمب جتگ یک گونڈل ءِ جِنِکے نمیران بیتگ ءُ دگہ یکے ٹپی بیتگ.

ھندی اھولانی ردءَ دوئیں کسانسالیں جنکو ھوشاب کوٹگ ءَ پہ لوگ ءِ ھاترءَ دار چِنگ ءَ روگ ءَ بیتگ اَنت کہ ایف سی ءَ یک گولہ ءِ جتگ کہ اِشی سوب ءَ یک گونڈل ءِ نمیران ءُ یکے ٹپی بیتگ.

چاگردی رسانکدر ءِ تندجاہ ءَ تالان ءِ یک تامر بند ءِ تہءَ گندگ بیت کہ بیرانیں ءُ ٹپی ءِ جنکواں یک اولاک ءِ تہ ءَ کُتگ ءُ مھلوک زھرشانی کنگ ءَ اَنت.

دی بلوچستان پوسٹ اھوال پتر ءَ سربیتگیں ھالانی ردءَ وئیل ءَ پد شھریاں مزنیں کساس ءَ سی پیک دگ ءِ سرءَ زھرشانی کُتگ ءُ دگ بند کُتگ.

بلے داں انگت اے وئیل ءِ پُشدرءَ لشکریانی ھچ پئیم ءِ درشان دیما نئیتکگ.

یات بہ بیت گوستگیں ماہ ءَ کیچ دمگ ءِ بنجاھی شھر تُربت ءِ ھنکین آبسر ءَ ایف سی ءَ تیرگواری کُتگ اَت ءُ تاج بی بی نامی ایں زالبول نمیران کُتگ اَت.

تاج بی بی ءِ برات طارق بلوچ ءِ نیمگ ءَ ایف سی ءِ ھلاپ ءَ ایف آئی آر نبشتہ کنگ ءِ دزبندی کنگ بیتگ اَت بلے دمگی واکداراں ناشناسیں مردمانی ھلاپ ءَ ارزی نبشتہ کُتگ اَت کہ آئی ھلاپ ءَ تاج بی بی ءِ کھول ءَ زھرشانی کُتگ اَت ءُ ایف آئی آر رد کُتگ اَت.

سرچمگ: دی بلوچستان پوسٹ