محبت گۆں پێغمبرءِ اهل‌بیتان واجب انت

فکر مه کن اِت که اهل‌بیت تهنا شیعه‌یانِ اَنت، بلکه آوان اهل سنتان هم اَنت. اے ٹکّءَ خب دلگۆش کن اِت که هماپێم که پێغمبرءِ اصحابانِ محبت واجب اِنت و مئے باورءَ تیوگێں اصحاب عادل اَنت، هماوڑ محبت گۆں رسول‌الله صلّی‌الله‌علیه‌وسلمءِ اهل‌بیتان هم واجب اِنت، هرکس آوانءَ بدءُرد گوش ایت اسلام نقصانءَ گند اِیت.

ما تشهدءِ تها وان اێں: «اللهم صلّ علی محمّد وآل محمد» آل محمد، رسول‌الله صلّی‌الله‌علیه‌وسلم ۆ حضرت علی ءُ بی‌بی فاطمهءِ زهگ اَنت. هرکس ماں نمازءَ په رسول‌الله ءِ اهل‌بیتان درود مه وانیت نمازِ ناقصءَ بیت. آوانءَ برزێں جایگاهءِ هست. مئے باور اێش اِنت که رسول‌الله صلّی‌الله‌علیه‌وسلمءِ اصحابان گۆں آوان جوانێں رهوت داشتگ ۆ آوانِ نیاما هچ دلگرانیءِ نه بوتگ. اگاں برےبرے اختلافءِ بوتگ شه قصد نه بوتگ، بلکه رد سرپدی بوتگ اَنت که ما نباید آوان باروا قضاوت کن اێں.