جاهمنندێں مردمان په پستءُ مقامءَ حق‌دارتر اَنت

ما ماں اے ملکءَ باز رنج ۆ زبهری دیستگ. شما زان اِت که سیستانءُبلوچستان ماں پێسرءِ حکومتءَ باز زبهر بوتگ ۆ شه آدگه استانان پدءَ منتگ. نون ما لۆٹ اێں ماں اے اسلامی حکومتءَ مے ملکی ۆ مذهبی حقان پوره دیَگ بےاَنت. هماپێم که پێسرءَ اے وعده ما را دیَگ بوتگ که جاهمنندێں مردم په کار گرگءَ حقدارتر اَنت، ما لۆٹ اێں اے وعدهءِ ردءَ کرد بیت. هبر پارسی ۆ بلوچ ۆ زابلیءِ سرءَ نه‌اِنت. اگاں ماں استانءَ جاهمنندێں کارزانت کم بیت، گڑا شه پارسی ۆ دگه راجان کار گرگ بیت، بلێں مے مولءُمراد اێش اِنت که وهدے جاهمنندێں کارزانت هست پچے درامدان کار گرگءَ بَےاَنت؟ مزن رهشۆنءِ جندءَ اے وعدهءَ را داتگ که شیعه ۆ سنیءِ نیاما هچ دگریءِ نێست ۆ په پست ۆ مقامءَ برابر انت.