استمانءِ مهمێں لۆٹ شه نۆکێں دولتءَ «رۆزێگی مشکلان حل کنگ» ۆ «تبعیض ۆ نابرابریان زۆرگ» اَنت

سنی‌آنلاین| مولانا عبدالغنی بدری ماں زاهدانِ جمعه نمازے دیوانءَ (15 مرداد 1400/ 6 اگست 2021) گۆں اشاره به نۆکێں دولتءِ آیگءَ درشانِ کرت: «اۆمێتوار اێں مردمان لۆٹ ۆ واهشتان چۆ پێسرءِ رندءَ به نااۆمێتیءَ بدل مه بےاَنت». آیی «رۆزێگی مشکلان حل کنگ» ۆ «تبعیض ۆ نابرابریان زۆرگ»ءَ را شه استمانءِ مهمێں لۆٹان شه سیزدمی‌ئێں دولتءَ زانت.

په سنی‌آنلاین هال‌رسانی‌ئے بنجاهے سرهالا، مولانا عبدالغنی بدری ائولی‌سرا به نۆکێں راجکماشءِ سۆگندءِ دیوان ۆ واجه شیخ‌الاسلامءِ حضورءَ اشاره کرت ۆ پدءَ ایرانءِ استمانءِ لۆٹانَ شه نۆکێں دولتءَ بیانِ کرت ۆ گوشتِ: هرچۆں که پێسرءِ دولتءَ جهد کرت، بلێں افسوز که نه توانتِ وتی شعارانءَ ۆ آ اۆمێتءِ را که په مردمان جۆڑِ کرت، پوره‌اِش کنت. ملکءِ وڑ وڑێں جاور ۆ هاس رۆزیگی ۆ معیشتی جاور رۆچ‌په‌رۆچ بدتر بوت اَنت ۆ لۆٹ ۆ واهشتءِ که لهتێں قوم ۆ مذهبانءَ داشت که آزاتی داشتگ بےاَنت ۆ نابرابری زۆرگ بےاَنت، هچ کجام پوره نه‌بوت اَنت.

مولانا عبدالغنی بدری وتی هبرانِ دێمترءَ گوشت: واجه رئیسی، نۆکێں دولتءِ سرمسترءَ گوشتگ که آیی دولت «دولت عمل» اِنت ۆ لۆٹ اِیت ملکءِ تها «بدلی» بیار اِیت. ما اۆمێتوار اێں که پراستی ملکءِ تها یک جوانێں بدلیءِ بێت ۆ لۆٹءِ که تیوگێں استمان شه آیی دولتءَ دار ایت چۆ پێسرءَ به نااۆمێتیءَ بدل مه‌بیت.

دارالعلوم زاهدانِ هێلکاریءِ معاونءَ گێش کرت: گۆں اێشی که ایرانءِ ملک شه منابع ۆ ذخایرءَ سرّێچ اِنت، انگت مردمانِ معیشتی جاور اگاں گۆں لهتێں همسایگێں ملکان سێل بیت اصلاً جوانێں جاورءِ نه دار ایت که اێشی سوَب ردێں سیاست ۆ مدیریت اَنت.

مولانا بدری تأکید کرت: ما اۆمێتوار اێں که ملکءِ جاور ماں وڑ وڑێں پڑان گهتر بیت ۆ مردمان رضایت که اللهءِ رضایت همێشی تها اِنت هم حاصل بیت.

مولانا عبدالغنی به اهل‌سنتءِ لۆٹان شه نۆکێں دولتءَ هم اشاره کرت ۆ گوشتِ: هاسێں لۆٹءِ که اهل‌سنتان چاگرد شه قوم ۆ مذهبان، شه نۆکێں دولتءَ دار اَنت اێش اِنت که تبعیض و نابرابریان زورگ بےاَنت و اهل‌سنتان مارشت مه‌کن اَنت که درجه دوئێں نندۆک اَنت.

مولانا بدری دێمترءَ گێش کرت: ما اۆمێتوار اێں که واجه رئیسیِ دولتءِ کابینه مردمی ۆ کاری‌ئێن کابینهءِ بیت.

🔹 زاهدان شهرءِ نۆکێں شورا «مردمی»ئێں شورای بیت ۆ په مردمان «هزمت» کنت

زاهدان جمعه ئے ادارکێں اماما ماں دگه بهری شه وتی هبران به زاهدانِ نۆکێں شورائے سوگندءِ دیوانءَ اشاره کرت ۆ گوشتِ: ائولی‌سرا شه زاهدان پێسریگێں شورای شهر ۆ درّێں شهردارءَ تشکر کنین که انصافاً په شهرءِ آبادیءَ باز جهداِش کرتگ، هرچۆن که هچ رمبءِ شه سستیءَ هلاس نه‌اِنت ۆ بازێں ناسرجمێں کار هست که باید پوره بےاَنت.

مولانا بدری گوشت: تاں اۆدءَ که ما سهی اێں زاهدان نۆکێں شوراءِ مردم لایک ۆ کارزانتێں مردم اَنت. اۆمێتوار اێں که زاهدان شورا ۆ شهردار که آیوکءَ معلومءَ بیت، همارنگ که سوگندءِ دیوانءَ جار اَش جت «مردمی» بَےاَنت و په مردمان «هزمت» کن اَنت و په شهرءِ آبادیءَ جهد کن اَنت.

آیی گوشت: زاهدان درّێں مردمان شه شوراءَ بازێن لۆٹءِ نه‌دار اَنت، بلێن کمترێں لۆٹ اِش اێش اِنت که هما کاران که دگه مزنێں شهران بیگ اَنت، زاهدانِ شهرءَ هم بےاَنت. مئے لۆٹ شه درّێن مردمان هم اێش اِنت که گۆں شورای شهر ۆ شهرداریءَ همکاری کن اَنت.

دارالعلوم زاهدانِ هێلکاریءِ معاونءَ وتی هبرانِ گڈی‌سرا گوشت: یک سۆگه‌ی هم په شورای شهرے باسکان دارین که اێشی جاها که میزان پشتءَ نند اَنت گێشتر مردمانِ نیامءَ بَےاَنت ۆ وتی جهدانَ شه نمازجمعه ۆ صداوسیمائے تریبونان ۆ گندۆنند گۆں مردمان جار جن اَنت ۆ گِردانءَ سهی کن اَنت.