نمازے قضا کنگ ۆ شهوات، دلے لۆٹان پدا روگ، سبب بوتگ اَنت که پێشے امتان بےسۆب به‌ینت

 شیخ‌الاسلام مولانا عبدالحمید ماں زاهدان جمعه نمازے دیوانا (3 اردیبهشت 1400/ 23 اپریل 2021) گوں استناد به سوره مریم مبارکێں 59مین آیت ءَ په نمازے وانگ، زکاتے دیگ، عدالت ۆ برابری ئے اجرا، گناهان ویل کنگ ۆ چاگردے اصلاح ءَ تأکید کرت.

په زاهدانِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید پد شه اے آیت ءِ تلاوت ءَ «فَخَلَفَ مِنْ بَعْدِهِمْ خَلْفٌ أَضَاعُوا الصَّلَاةَ وَاتَّبَعُوا الشَّهَوَاتِ» [مریم: ۵۹] درشانِ کرت: قرآن عظیم‌الشأن که الله ئے آخری اێں کتاب اِنت ۆ دین اسلام ءِ ٹوهترێں معجزه اِنت، دێم ۆ درا پێشے امتان بےسۆبی ئے سببانَ بیانَ کنت. الله تعالی ءَ ماں مبارکێں سوره مریم ءَ پد شه نبیانِ قصهانِ بیانَ پرمائێنیت که آوان که شه اے نبیان ۆ پد آت اَنت گوں دۆ ٹوهێن سکّیان دێم په دێم بوت انت؛ یکّے اے که نمازانَ قضا اِش کرت ۆ دگه اے که نفسے لۆٹ ۆ واهگان پدا شت اَنت.

واجه ءَ گێش کرت: نماز شه دینے ٹوهێن اصلان ۆ شه فرایضان  اِنت. افسوز اِنت که بازێنے شه مسلمانان نمازَ نه وان اَنت. وهدے که مسلمان نمازا قضا کنت چه بۆئے شه اسلام ۆ حضرت محمد ءَ داریت که وت ءَ محمدی گوش اِیت؟ تهنا ایمان ۆ باور په رکّگ شه الله ئے عذابان ۆ جنتے شتن ءَ بس نه اَنت، بلکه نێکێن کردار هم زلور اِنت؛ هماپێم که الله تعالی ءَ پرمائێنیت: «إِنَّ الَّذِينَ آمَنُوا وَعَمِلُوا الصَّالِحَاتِ كَانَتْ لَهُمْ جَنَّاتُ الْفِرْدَوْسِ نُزُلًا» [کهف: ۱۰۷]

زاهدان جمعه ئے اماما وتی هبران دێمترا به «زکات» ءَ که یکے شه دینے ارکانانِ اِنت، اشارهء کرت ۆ درشان کرت: زکات شه دینے ارکان ۆ مهم اێں اصلان اِنت. مسلمانے که دینے رکنان ءَ پرۆشیت شه آیی دین ءَ چے ءَ مانیت؟! کسے که نمازَ نه وانیت ۆ زکاتَ نه دنت وت ءَ په جهندم ءَ تیار کنت. الله تعالی پرمایشَ کنت: «وَلَا يَحْسَبَنَّ الَّذِينَ يَبْخَلُونَ بِمَا آتَاهُمُ اللَّهُ مِنْ فَضْلِهِ هُوَ خَيْرًا لَهُمْ بَلْ هُوَ شَرٌّ لَهُمْ سَيُطَوَّقُونَ مَا بَخِلُوا بِهِ يَوْمَ الْقِيَامَةِ» [آل‌عمران: ۱۸۳]. آ زرّان که زکاتش دیگ مه بیت قیامتے رۆچ ءَ جهندمی اێں گُٹّی ئے به‌یَنت به وتی واهندے گردنا. زکات بےوس ۆ ناداران حق اِنت، کسے که نماز مه وانیت ۆ زکات مه دنت ۆ رۆچگ مه گیت ظالمے.

دارالعلوم زاهدان سرمستر ءَ گوں اشاره به پێشے امتان دۆمی اێں سکّی ءَ درشان کرت: دۆمی اێں مهمێں سکّی ئے که امتان شه وتی نبیان ءُ پد گوں آیی دێم په دێم بوت اَنت اێش اَت که وتی نفسے لۆٹان پدا شت اَنت. بازێن انسانے وتی نفس ءِ ناجایزێن لۆٹان پدا شت اَنت چۆ جادو، زنا، شراب واری، ربا، درۆگ، بِنڈ، ناحق اێں قتل ۆ ٹوهێں گناهان، اے گناهان انسان ءَ به جهندم ءَ براَنت.

واجه ءَ گێش کرت: مردمان مالے ورگ، بےگناهێں هۆنے رێچگ ۆ قاتلے بدل ءَ شه آیی سیادان کشگ ۆ اے وڑ گناهان شه نفسے لۆٹان اَنت. ما حق ندارێں که وت قاتل ءَ کش اێں، باید آیرا آمیدگس ءَ دےاێں که محاکمه بیت.

واجه ءَ گوشت: افسوز اِنت که مرۆچی یتیم ءِ مال ۆ جنێنانِ گڈ ورگَ بیت. عدالت که شه دینے ٹوهێں اصلان اِنت اجرا ءَ نه بیت. هرچۆن که اے باروا الله ئے اصلی اێں مخاطب حاکم اَنت، بلێں ما گرد باید عدالت ءَ اجرا کن اێں.

مولانا عبدالحمید وتی هبرانِ دێمتر ءَ به قرآن ءِ تلاوت ءَ اشاره کرت ۆ گوشتِ: باید قرآن ءَ سکّ ساتێں، پچے که بےقرآن ءَ هدایت ماں چاگرد ءَ نه‌یَیت، پمێشی قرآن بوان اِت ۆ قرآن ءَ سرپد بے‌اِت، ماں قرآن ءِ ترجمه ۆ تفسیرے کلاسان بهر زور اِت ۆ قرآن ءَ وتی زهگانَ یات دےاِت.

زاهدانِ جمعه ئے اماما دوری شه قرآن ۆ سنت ءَ را شه جهان اسلامے مشکلان سببان زانت ۆ گوشتِ: اگاں مرۆچی امت مسلمان گوں سکّیان دێم په دێم اِنت ۆ گناهے آچشے تها سُچیت، آیی دلیل همێش اِنت که شه قرآن ۆ پیامبر صلی‌الله‌علیه‌وسلم ءِ سیرت ءَ دور بوتگ.