مولانا خیرمحمد ندوی ءِ زندهال

واجه مولوی خیرمحمد ندوی ءِ دۆر یک وژدلین دورے ات که گْوَست، یک رُژنائین روچے ات که اێر شت، یک  درے ات  که په بُنکی بند بوت، یک گوهرے ات که بےقدریان بائنت، یک جهدے ات که په سر نه شت، یک واهگے ات که گون نه کپت، یک ارمانے ات که اشکند بوت.

اے راجدوست ءُ زبان پهازێں انسان ءَ 1909 ءِ سال ءَ ماں اے جهان ءَ وتی چم پچ کرت انت. آئی ءِ واجهین پت میر سید محمد بلوچ ءُ آئی ءِ پیرینانی بهه ءُ هاک سردشت، سرباز (رۆچ اێرشتی بلوچستان) ات که هما وهد ءُ زمانگان لڈّ ات ءُ همے ملکان اتک انت. واجه ندوی ءَ وتی بنگیجی وانگ چه «مدرسه احرار الاسلام» ءُ در برت. چد ءُ رند نامدارێں مدرسه «مظهر العلوم» کڈه ءَ شت ءُ کم ءُ گێش داں هپت سال ءَ همودا ونت ئی. گڑا سرئی هندوستان ءَ کپت. وتی پشکپتگێں وانگ ئی همودا سرجم کرت.

مولوی خیرمحمد ندوی چه کسانی ءَ بلوچ‌دۆست ءُ جپاکارێں مردمے ات. گوں هندوستان ءِ روَگ ءَ آئی ءِ دل ءِ مهر ءُ هدۆناکی په وتی قوم ءَ دو سر بوت. چه لکهنو ءِ آیگ  ءَ رند وتی توامیں زندئی چه راج ءَ ندر کرت. چوشکه 1933 ءِ سال ءَ «ینگ بلوچستان» ءِ نام ءَ تاکبندے کش ات ئی. 1948 ءَ «دی بلوچ ایجوکیشنل سوسائٹی» ئی جوڑ کرت. 1949 ءَ مزنیں جهداں پد چه ریڈیو پاکستان کراچی ءَ بلوچی مراگش ئی بنگیج کرت. چه اے کاران ابید بلوچ سیکنڈری اسکول (1950)، بلوچ انٹرمیڈیٹ کالج (1966)، کچکول (1978)، ماهتاک «سوغات» (1978)، بلوچی معلم (1981)، اخلاق گلدان، آئی ءِ گچێنی کار ات اَنت. چرێشان رند قاضی عبدالصمد سربازی ءِ کلام پاک ءِ ناسرجمێن بلوچی ترجمه ءِ کارئی همارنگ ءَ سرجم کرتگ که مردم علامه شبلی ءُ سید سلیمان ندوی ءِ «سیرت النبی» ءِ ترانگ ءَ کپ ایت. وتی گڈی رۆچان واجه ءَ تبلیغی جماعت ءِ مولانا محمدزکریا ءِ کتاب «فضائل اعمال» ءِ ترجمه هم کرتگ ات، که همے هنوگاں چهاپ ءُ شنگ بوتگ.

زندءِ گڈی رۆچان واجه ندوی نادراهیان سک نگیگ کرتگ ات. اے وهد ءَ آ ماهے وش ات ءُ ماهے اسپتال ءَ ات. چه آئی ءِ لاپ ءَ پدّرێں زگرێں هون شتگ ات. همے پێما داں هما رۆچ آتک که ڈاکتراں پهک جواب دات. آ بهادرآباد کراچی ءِ انیس بانٹوا اسپتال ءَ داخل ات که 26 نومبر 2000 ءَ آ سک بےتب ءُ نگیگ بوت. مردم واجه ءِ نێم زندێں ءُ گرانبهائێں مڈی ءَ په ناکامێں دلے لوگ ءَ آرگا اتنت که نێم راه ءَ واجه خدا ءَ وتی امانت دست گپت. (إنا لله وإنا الیه راجعون)

سرچمگ: ماهتاک بلوچی لبزانک