اۆگانستانے سُهلے ترانکاری کنۆکان شه وت دورچاری، پراهدلی ۆ دلسۆچی نشان دےانت

شیخ‌الاسلام مولانا عبدالحمید، ماں زاهدان اهل‌سنتے جمعه نمازے دیوانا (22 اسفند 1399/ 12 مارچ 2021) وتی وشّالی ءَ شه سهلے ترانکاریان درشان کرت ۆ آوانَ په دورچاری، پراهدلی ۆ دلسۆچی په اۆگانستانے مردمان سۆگهِ کرت.
په زاهدانِ اهل‌سنتے جمعه ئے پێشنمازے کارگسے هال‌رسانی ئے بنجاهے سرهالا، شیخ‌الاسلام مولانا عبدالحمید درشان کرت: افسوز اِنت که درّێن اۆگانستانے ملک چنکه سال اِنت که ناتپاکی ۆ جنگ ۆ چێڑهانِ آچش ۆ لهتێن دگه ڈنّے زۆربندێں ملکان که په زۆر اۆدا آتگ اَنت، آوان آچشے تها سۆچیت.
زاهدان جمعه ئے خطیبا وتی وشّالی ءَ شه سهلے ترانکاریان درشان کرت ۆ آوانَ اے وڑ سۆگهِ کرت:‌ نون که سهلے دروازگ ماں اۆگانستان ءَ پاچ بوتگ، اے باز جْوانێں هالے، بلێن اۆگانستانے دولت ۆ طالبان که سهلے باروا ترانکاریَ کن اَنت ۆ همےرنگ تیوگێن دنیائے ملکان زانت اَنت که تهنا گوں سهل ءَ آ ملکے تها امنیت جۆڑ ءَ بیت.
واجه‌ئا گێش کرت:‌ اے اۆگانستانے جوانێن ۆ مهترێن مردمان حق اِنت که ماں سهل، امنیت ۆ اشکام ءَ زندگی کن اَنت ۆ په وتی ملکے آبادی ۆ دێمروی ءَ جهد کن اَنت. پرێشی سهلے ترانکاری کنۆکان باید شه وت پراهدلی نشان دےاَنت. اگه اۆگانستانے ذمه‌واران مه لۆٹ اَنت وتی کار ۆ جاه ۆ مقام ءَ یله دےاَنت، یا آدگه پاٹی شه وتی جاگه ءَ جهل مه یئت، آ ملکے سهل جۆڑ ءَ نه بیت.
زاهدان جمعه ئے اماما وتی هبران دێمترا گوَشت: ما را امێت هست که اۆگانستانے سهلے ترانکاری کنۆکان شه وت دورچاری، پراهدلی ۆ دلسۆچی نشان دےاَنت تاں سهلے بیت که الله راضی بیت ۆ اۆگانستانے درّێن مردمان به عزت ۆ اشکام ءَ رسنت.

🔹 یمن مردم جنگ ۆ مێڑے بدلا «ترانکاری» کن اَنت ۆ په «سراسری اێن دولتے» پکر کن اَنت
شیخ‌الاسلام مولانا عبدالحمید ماں دگه بهرے شه وتی هبران گوں اشاره به یمن جنگے جاوران گوَشت: یمن هما ملکے مردمانِ اِنت ۆ دگرانِ نه اِنت. افسوز اِنت که آ ملکے جاور باز بد اِنت ۆ ٹوه ۆ گوَنڈان شه گُشنگی ءَ مرنت.
واجه‌ئا گوَشت: جنگ ۆ مێڑ ۆ ارش ۆ بم‌گواری په یمن مردمان غیر شه نقصان ۆ ضرر ءَ دگه آسراتے نه داریت. یمن مردم باید جنگ ۆ جێڑهانِ بدلا گوں وت نندنت ۆ ترانکاری کن اَنت ۆ په سراسری اێن دولتے پکر کن اَنت که گردان حقان کمار به‌ینت.
زاهدان جمعه ئے اماما اسلامی ملکان مشکلانَ ناتپاکی ئے برورد زانت ۆ گوشتِ: اسلامی ملکان ناتپاکیان په آ ملکان باز بدێن ۆ گندگێن برورد داشتگ ۆ سبب بوتگ که قسم وارتگێن دشمنان آوان نیاما جتایی ۆ جێڑه جۆڑ کن اَنت.
مولانا عبدالحمید تاکید کرت: اسلامی ملکان باید گوں وت تپاک کن اَنت تاں جنگ ۆ ناامنیان شه خاورمیانه ءَ دور به‌ینت. هاس سُهل ۆ همدگرے حقان کمار کنگ ۆ سراسری اێن حکومتان بن‌هشت اێرکنگ ءَ توانت امنیت ۆ اشکام بیاریت.