امیت انت کہ نیم بندگیں پروژہ ھرچی زودتر سر جم ببنت

شیخ‌الاسلام مولانا عبدالحمیدا زاھدانِ گوستگیں جمعة نمازِ (8 شهریور 1398) گپ و ترانانی تھا چابھارِ بندرِ توسعه، راہ آھن‌ و گازرسانی پروژہ‌یانی سرجم کنگ و استانِ مھمیں جاده‌یانی دوباندہ کنگ پہ سیستان‌وبلوچستانِ دیمرویا ھژدری کار گوشت انت و دولتی په ناسرجمیں کارانی سرجم کنگ پہ اے استانا کڈِّنی کت.
چہ زاھدانِ اھل سنتِ جمعہ پیشنمازِ دفترِ حال‌رسانی حالا، واجہ شیخ الاسلاما وتی گپِ دیم ماں دولتِ ھفتگِ نیمگا کش ات، چہ دولت مردانی مراد باتیا پد، واجہا درّاینت: الحمدللہ دولت مئے کشور و استانے تھا بازیں جھدے کنگ انت بلے استان سیستان و بلوچستانِ تھا لھتیں کار ھست انت آھاں آیانی نیما دلگوش کنگ ببیت پہ استانا مزنیں کاروباری موکل و دیمروی یے بیت کنت.
دیمترا واجہا گوشت: چابھارِ بندرشھید بھشتیِ توسعه چہ ھما مھمیں کاران انت. چیا اے بندر چہ ھما استراتیژیکی بندران انت کہ ایرانِ گوں میانی آسیا و دگہ کشورانی راہ انت.
زاھدانِ اھلسنتِ جمعہ پیشنمازا گوشت: چابھار-زاھدانِ راہ آھنِ پروژہ، استان تھا گاز رسانی و چابھار-میلکِ جادہِ دوباندہ کنگِ نیما دلگوش کنگ پہ استانِ توسعہ و دیمرویے بیت کنت. امیت انت کہ اے پروژہ ھرچی زودتر سرجم ببنت.

✅«شایستہ سالاری» یکدل بیگ و براتیِ سوَب بیت
مولانا عبدالحمیدا -اے مراگش تھا که دکتر ذہنی وند، سیستان و بلوچستانِ استاندارِ سیاسی معاون هن حاضر ات-، گوشت: انچش کہ دکتر ذہنی وندا گوشت؛ مردمانی دو دیم بیگ استانِ ناں بلکیں کشورِ تھا تاوان انت، چیا کہ ما یکیں امت و ملت ایں. ایرانِ مردم شیعہ و سنی وت ماں وتی برات انت.
واجہ دیما پہ «شایستہ سالاری»ِ المی کنگا کڈِّنی کت و گوشتی: لایقی چارگ ببیت ھرچ قوم و مذھبِ تھا بے ریا روییا چہ لایقیں مردماں کار گرگ ببیت. مئے باور ھمش انت کہ آ کافر کہ کشورِ تھا ھست انت آیانی حق دیگ ببیت و چہ آیانی لایقیں مردماں پہ کشورِ دیمروییا وتی فنِ تھا کار بند اِت.
زاھدانِ اھل سنتِ پیشنمازا لایقیں مردمانی کار گرگ دراھیں مردمانی لوٹ و واھگ زانت و گوشتی: ما کشورِ دراھیں سر براھاں دلجمی دئیں اگاں چہ ھرچ قوم و مذھبا لایقیں مردماں کار ببند اِت، کشورِ تھا براتی و ھمدلی کیت. گوں اے کارا سرجمیں سربراھایی کہ آیانی سر مقام معظم رھبری انت دلِ واھگ سر جم بنت.
مولانا عبدالحمیدا دیمترا گوشت: الحمدللہ سیستان و بلوچستانِ استاندار، دولت و ولی فقیہِ جاگہا گوں نیکیں دیدانکاں استانِ لایقیں مردماں کار بندگیں. امیت انت کہ مردم و دولت آیاں گیشتر ھمراھی بکننت.
زاھدانِ اھل‌سنتِ پیشنمازا وتی گپانی گڈّی بھرا محرّمِ بابتا گپ جت و گوشتی: محرم ماہا خاص عاشوراءِ دھہ مئے کشورِ تھا خاصیں روچ انت. امیت انت کہ مراگشانی گرگا و بزرگانہ ستایا دوئیں طرفانی (شیعہ و سنی) مقدسانی ھیال داری کنگ ببیت. دراھیں مسلمان یکے دگریِ عقیدہ و مقدساتانی احتراما بکننت.