چمشانکے عمران‌خانِ کابینه سرا

چنت روچ رند چه عمران‌خانِ گچیں بیگا په پاکستانِ مزن‌وزیریا، آئیا وتی کابینۂ گیشتریں اعضای و باسک الّم کرتنت. عمران خانِ کابینۂ چن‌ومانچنِ تھا ھچ ھبکّہ و شگفتی مان نیست. اے کابینه تھا نوکیں چھرہ و بےنام و تواریں کسے گندگ نبیت.
عمران خانِ شعار «نیا پاکستان/ نوکیں پاکستان» انت؛ گوشیگا واجہ خانِ کوشش ھمیش انت کہ گوں قدیمی کارزانتانی کمکا نوکیں پاکستانا جوڑ بکنت.
حزب تحریک انصافِ کابینۂ ٹوہ‌تریں چیزے کہ باز آئی نیمگا دلگوش کنگ بوتگ، ایش انت کہ پیشی دیکتاتور ژنرال پرویز مشرفِ کارگزار و کارنده‌یانی ھور کنگ بوتگنت۔ چه 21 وزیر و مشاوراں، 12 نفرا پیسرا ماں مسلم لیگ (قائد اعظمِ شاخہ) تھا ٹوھیں پست چوشکہ وزارت گون بوتگ؛ مسلم لیگِ حزب (قاف) سال 2001 ءَ جوڑ کنگ بوت و سک زوت پہ جنرال پرویز مشرفا سیاسی کوپگ و کمکے ترّ ات.
فروغ نسیم خان کہ عمران خانِ کابینۂ تھا په “وزیر قانون” سوگندی وارتگ، مں پرویز مشرفِ «ملکِ خیانتِ» پرونده تھا آئیِ وکیل مدافع انت. واجہ نسیم یکے چہ پاکستانِ نامدار و زرنگیں قانون‌زانتان انت.
عمران خانا مشرفِ حکومتِ دورا زندانِ سارتیں آپ ایر کشّتگ انت و یکے چہ آئیِ ترندیں منتقدان بوتگ. ھنو کہ آئیِ وکیل مدافعی وتی‌کابینہ تھا راه داتگ، جاہ‌ نیئیت کہ باریں اے دیکتاتورِ محاکمہ تا کجا برسیت.
عمران خانِ باسکانی تھا تا ھنّو چہ دینی اقلّیتاں ھچ کس گندگ نبیت و وزارت کشورِ سیٹّ ھں انگت بے صاحب انت.
گوں اشیا کہ “تحریک انصافِ” گیشتریں دوزواہ جوان و ورنا بوتگ انت، بلے کابینۂ تشکیل دیگ و چن‌مانچنا ورنایانی نیمگا دلگوش نبوتگ. البت لھتیا اے کار گوں مثبت و جوانیں دیدیا چار اتگ و گوشتگش کہ اے کابینۂ باسکانی “تجربه” و “تخصص” یکے چہ اے کابینۂ گھتریاں پیش داریت و گیشتریں وزیراں برزیں تحصیلات ھست و دنیاءِ مزنیں زانتجاھانی تھا درسش وانتگ. بلے یک مشکلے ادا انت کہ لھتے چه اے وزیراں گوں وزارتجاھے کہ آیانی تھبیلا دیگ بوتگ ھچ نورنت. لھتے سیاسی چاروک/ناظر گوشنت کہ اے کابینۂ گیشتریں باسک عمران‌خانِ وتی پسند کتگیں نھنت بلے آئیا چہ ناچاری سرا گچیں کرتگ انت.
اگہ اے کابینۂ بانکانی نیمگا چمشانکے دور بدئیں زانیں کہ بانکانی ھوری اے کابینه تھا کم‌رنگ نھنت. سے جنیں اے کابینہ تھا ھور انت کہ بسّ یکے چہ آیاں (ڈاکٹر شیرین مزاری، حقوق بشرِ وزیر) چہ “تحریک انصافِ” قدیمی باسکان انت. بانُک مزاری چہ قبیلہ مزاری «راجن‌پور» چہ ایالت پنجاپِ جنوبی نیمگا انت کہ بندرا بلوچ انت، بلّی که مزاری غیر چہ بلوچی پہ سرائیکا ھں گپ کننت.
«زبیدہ جلال» یکے دگہ چه کابینۂ باسکان کہ تولیدات دفاعیِ سیٹِّ واھُند بوتگ، بلے گوں اے وزارتجاھا ھچ نسبتے آرا نیست. اے بانک پرویز مشرفِ دورا شوکت عزیزِ کابینه تھا تعلیماتِ وزیر بوتگ کہ یک مزنیں وزارتے زانگ بیت. زبیدہ جلال بلوچستانِ “عوامی” حزبِ باسک بوتگ و چه ھمے راھا پاکستانِ ملی مجلسا مان بیتگ. اے تھنا بانکے انت کہ چہ ایالت بلوچستانا توانتگی ملی مجلسا مان بیت. زبیدہ جلال پیسرا مسلم لیگِ دوئیں حزب «ق» و «ن» تھا باسک بوتگ. بانک جلال 59 سالہ چہ “کیچ” مردمان انت. اے بانکا انگریزی ادبِ فوق‌لیسانس ھست و یک جوانین و موفقیں نمونہ اے پہ بلوچیں بانکاں زانگ بیت. اے بانُک ھمے پیم چه ایالت بلوچستانا کابینۂ تھنائیں باسک انت.
اے چیزا ھں باید دلگوش کنیں کہ پاکستانِ سیاسی نظام تھا په هر وزارتجاھا دو وزیر گچیں کنگ بیت، یکے ملی وزیر و دگرے وزیر دولتِ که گیشتریں اختیارات ملی وزیرِ دستا انت، و وزیر دولت چو معاون وزیرِ وڑا انت.
گوستگیں دولتانی تھا وزیر دولتِ ھنچو گچیں کنگ بوتگنگ کہ اڑ و اعتراضانی توارا بواپین انت و پھکاں ونڈے برسیت و دپ اش بندگ بیت. چو کہ جاہ کئیت نوکیں دولتِ تھا ھں اے چیزّ لحاظ کنگ بوتگ.

📝رجانکار: شاکر رئیسی