مولانا عبدالحمید چه قطرِ روگا منع کنگ بوت

واجه مولانا عبدالحمید اِێران اهل‌سنت ٹوهێں عالم و زانتکار که قرار اَت گۆں قطرِ بلۆچانی دعوتا گوستگێں پنجشنبها دێم په قطر بروت چه اێرانِ حکومتِ نێمگا منع کنگ بوت.
په سنی‌آنلائنِ هالکاریا، واجه مولانا عبدالحمید اول سرا چه زاهدان دێم په تهران شتگ و قرار بوتگ که واجه چه تهرانِ گۆں بالیا دێم په قطر بروت، بلے چه حکومتِ نێمگا په واجه زنگش جتگ و گوشتگش که ترا روگِ اجازت نیست، گهتر همێش اِنت که تو بالی‌پٹّا/فرودگاها میایے اگه بیایے هں ما ترا پچ ترّێنێں.
رند چه اِے گپا واجه مولانا عبدالحمید پنجشنبها پدا دێم په زاهدان برگشتگ.
پێسر چه اِشی هں واجه مولانا عبدالحمید چند برا چه سفر کنگ په دگه ڈنی ملکان منع کنگ بوتگ، تازه‌یاں واجه مولانا عبدالحمیدا لۆٹتگ که «رمشک» که قدیما بهرے چه بلۆچستانا بوتگ و هنّو کرمانا لچّێنگ بوتگ بروت که حکومتا اجازت نداتگ.