سیستان ؤ بلۆچستانِ شش جهگیرا وتی مخالفت گۆں استانِ بهر کنگا جار جت

سیستان ؤ بلۆچستانِ شش جهگیرا مں اێرانِ پارلمانا وتی مخالفت ؤ بےزاری چه استانِ بهر بهر کنگا مں یک نمدی/نامه اِے که په راجکماشا/رئیس جمهورا نبیسگ بوتگ، جار جت.
په سنی‌آنلائنِ هالکاریا، اِے ششێں جهگیراں وتی نامه تها استانِ محرومی ؤ‌ پدمانگِ سبب، ردێں سیاست ؤ بےونڈی چه ملکِ عمومی منابعا زانتگ.
اِے نامه تها په استانِ مشکلاتِ حل بیگا تأکید بوتگ ؤ نبیسگ بوتگ: لازم اِنت که په جوانی استانِ مشکل درگێجگ ؤ‌ حل کنگ بنت تا سیستان ؤ بلۆچستانِ مردمانی حق ؤ حقوق چه اِدا گێشتر بێگواه مبیت.
اِے نامه‌یِ امضا کنۆکاں وتی مخالفت گۆں استانِ بهر کنگا جار جتگ ؤ گوشتگ اِش: ما استانِ گونڈ بیگا هچ پیما ملی منافعِ دست‌کپگِ راه نزانێں، بلکێں ملکِ پێشی بهرکنگا که گوستگێں سالانی تها بوتگنت، بدتر ایرانی قوم ؤ راج چه وت دور کرتگنت ؤ چاگردی جدایی گێشتر بوتگ.

اے جهگیراں نامه امضا جتگ:
1ـ دکتر احمدعلی کیخا (زابل، زهک، هیرمند، هامون ؤ نێمروزِ جهگیر)؛
2ـ دکتر محمدنعیم امینی‌فرد (اێرانشهر، سرباز، دلگان ؤ فنۆچِ جهگیر)؛
3ـ مهندس علیم یارمحمدی (زاهدانِ جهگیر)؛
4ـ عبدالغفور ایران‌نژاد (چهبار، نیکشهر، کنرک ؤ کسرکندِجهگیر)؛
5ـ محمدباسط درّازهی (سراوان، سیب، سوران ؤ مهرستانِ جهگیر)؛
6ـ مهندس علی کرد (خاش، میرجاوه، نصرت‌آباد ؤ کورینِ جهگیر).