عالِمانی گوشت زَهردار و سَمّی‌ گوشتے

ماں حدیثا آتکگ: اے سَئیں مردمانی بے احترامیا بس دوتَل و دورنگیں(منافقیں) مردمان کننت:
1. پیریں مسلمان؛
2. عالِم؛
3. انصاف والائیں بادشاه.
ماں دگه حدیثے آتکگ: آ کَسے که ٹوهینانی احتراما مکنت و گونڈینانی سرا مهربان مبیت و عالِمانی قدردانیا مکنت چه ما نهنت (مسلمانے نهنت).
امام بخاری چه واجه انس و واجه ابوهریره رضی‌الله‌عنهما چه قدسی حدیثے اے ڈول روایت کنت: هرکسے منی دوستانا توهین بکنت آئیا گوں من جنگِ جار جتگ، دگه جاهے گوشیت: من جنگِ جار گوں آئیا کتگ.
بازینے چه بزرگان، عالمان و اولیاءاللهِ بے ادبی کنگ مزنیں گناه(کبیره) نبشتگ.
علامه زرکشی بخاریِ شرح دیوک برزادی حدیثِ بابتا گوشیت:
ماں اے حدیثا کمے پگر بکن‌ات که عالمانی بے احترامی کنگِ گناه گوں سُودوار و رِبا واراں برابر کنگ بوتگ، اودا که قرآن گوشیت: «فَأذَنوابِحَرب من الله و رسوله»
بزاں ربا واریں مردماں په جنگ کنگا گوں الله پاکا وتا تیار بکننت.
حافظ الحدیث امام ابن عساکر رحمه‌الله گوشیت:
اَے دوست و همبلاں پاکیں الله ما و شما را پکّائیں توفیق بدنت انت و په راستیں راها رهشونیں بکنت، بزان‌ات و آگاه ببِت که عالمانی گوشت زهرین انت، اِے اللهِ سُنت انت که هرچ کسے عالمانی کمّیا بگوشیت و آیانا توهین بکنت، الله پاک آئیا رسوا و بنّام کنت و پیسر چه مرگا الله پاک آئیا گوں دلِ مرگا دچار کنت.
دلگوش: عالمانی گوشتِ زهری و سَمّی بیگِ مراد اشنت که قرآن مجید باپُشتِ گپ جنگا گوں مُردگِ گوشتِ ورگا مثال داتگ و هرچ کسے که عالمانی باپشتا گپ بجنت آیانی گوشتا ماں ورگ انت بلے اے گوشت زهرین انت هرچ کسے چه اے گوشتا که زهری مان انت بوارت دین و دنیایی تباه بیت.
و دلِ مرگِ بزانت اشنت که آ دل نیکی و بَدیا سرپد نبیت و نماریت.
هر کَسی غیبت کنگ و حقیر زانگ شریں کارے نهنت، گوں عالماں اے پیم کنگ اللهِ هژم و غضبِ تها مردما چَگَلَ دنت، عالمان نبشتگ که چشیں مرمانی سرانجام باز بد و خطرناک انت.

🔹(اے نبشتانک چه مفتی اعظم پاکستان بزان مفتی محمد شفیع رحمه اللهِ کتابا که نامی «گناهان بی لذت» انت رجانک کنگ بوتگ)