ذوالحجهءِ اولی ده روچ جوانیں فرصتے په اللهءِ عبادتا

شیخ‌الاسلام مولانا عبدالحمیدا ماں وتی اِے هپتگءِ جمعهءِ گپاں (12 شهریور 1395/ 2 سپتامبر 2016) په ذوالحجهءِ اولی ده‌روچءِ فضیلتا گپ کرت و په اِے ده روچءِ گیشتر بهر زورگا تاکید کرت.
په سنی‌آنلاینءِ هال‌رسانی وب‌تاکءِ هالکاریا، واجه مولانا عبدالحمیدا مں وتی گپانی اولی بهرا گوشت: ما تماماں دنیاءِ تها اللهءِ نیمگا رهادگیں و مئی سفرءِ آخر ملاقات گوں الله اِنت. مئی حالت ماں اِے سفرا جاه نیئیت که باریں کامیاب بئین و اللهءِ رضامندیا دستا کاریں یا که الله‌ها چه وت ناراض کنیں.
هرشپ و روچے که چه مئی زندگیا گوزیت ما په الله و آخرتءِ سفرا نزیکتر بئیں. باید گیشتر په اِے سفرا وتا آموده کنیں. باید چه اللهءِ نعمتاں که جاندراهی و راحتی اِنت په شری بهر زوریں.
واجها ذوالحجهءِ اولی ده روچ ٹوهیں فرصتے په اللهءِ عبادتا زانت و گوشتی: ذوالحجه نزیک اِنت و ذوالحجهءِ ده‌روچ چه گراں قیمتیں فرصتان اِنت که باید چه آئیا په اللهءِ رسگا بهر زوریں اے شپانی عبادتا چو قدرءِ شپانی وڑا مز و ثواب هست. هر روچے روچگا یک‌سالے اندازه ثواب هست و عرفه (ذوالحجهءِ نهمی) روچا دو سال اندازه‌یا ثواب هست.
واجه مولانا عبدالحمیدا په آخرتءِ سفرءِ تیاریا تاکید کرت و گوشتی: چه دنیاءِ فرصتا باید په آخرتا تیاری کنین و په وت توشگے زوریں. باید په هما روچا تیاری کنیں که مال و زهگا ں هیچ سودے مردما ندینت بلکیں هما دل که چه کفر، شرک و نفاقا پاک بیت و پر چه اخلاص و تقوا ببیت انسانءِ دردا وارت.
واجها گیش کرت: هر دابیں اعراض و دیم ترّینگ چه اللهءِ حکماں گونڈ بیت یا مزن، قیامتءِ روچا مزن چمّا کئیت. باید توبه کنین و چه هر دابیں نافرمانیا پهریز کنیں.

?مولانا عبدالحمیدا دیما وتی اپسوز چه ایرانی حاجیانی پَشکپگ ماں اِے سالءِ حجا درشاں کرت و گوشتی: گوستگیں سالاں اِے وهداں مئی مردم په حاجیانی رهادگ کرتنا باز گل و شاد اِتنت، بلے اپسوز اِنت که اِے سالا ایرانی نتوننت اِے مبارکیں سفرا برو اَنت.
مولانا عبدالحمیدا گوشت: آ پیم که انتظار هست اَت دل‌پراهی و مزن‌دلی خاصکار سعودی عربءِ‌کارمسترانی نیمگا پیش دارگ نبوت. ما را امیت اِنت که که دیما اِے مبارکیں سفرءِ راه په مردماں پاچ کنگ بیت و مئی مردماں مسجدالحرام و مسجدالنبیءِ رو و آ ببیت.
واجها گوشت: همے پیم ما را امیت اِنت آ کسانے که په اِے سفرا رهدگ بوتگنت و هنو نتوانتگش که برو اَنت، ماں اِے مزّ و ثوابا شریک باتنت و هما برکت و رحمتاں که حاجیانی سرا رچ اَنت، الله مئی گردانی سرا نازل کنات.
?واجه مولانا عبدالحمیدا ماں وتی گپانی گڈسرا چه زاهدانءِ رودرآتکی نیمگءِ زمینانی ثبت و سند کنگا چه کارمستراں منتواری کرت.
?مولانا عبدالحمیدا همے پیم چه دانشگاهی دربروک و فرهنگیاں لوٹت که په دینی احکام و مسائل ءِ یادگرگا بیاینت دارالعلوم زاهدانءِ شپی کلاساں بهر زورنت و دینی احکام یاد گر اَنت.