اهل‌سنّتا صحابیانی بدگوشگ ماں ایرانءِ ٹلویزیونا په ترندی اِیرجت و محکوم کرت

سنی‌آنلاین-بلوچی/ گوستگیں شنبهءِ شپا (22 مرداد 95) «مهران مدیری» یکّے چه اِیران فلم‌ساز و تَنزگراں ماں یک پروگرامے که چه ایرانءِ صداوسیما و«نسیم»ءِ چینل/شبکه ئا شنگ بوتگ، حضرت طلحه و زبیرءِ سرا لعنت دیم داتگ و آئی بدوبیراه گوشتگنت؛ چه هما روچی ایرانءِ اهل‌سنتا مختلفیں شکل و وڑاں وتی گله پیش کرتگ و صحابهءِ بدوبیراه گوشگ په ترندی اِیرجتگ و محکوم کرتگ.
اِے اعتراضانی ردا اهل‌سنتءِ نماینده و جهگیراں ماں پارلمانا چه پیگمبرءِ صحابیانی اهانت و بدوبیراه گوشگا گلّه کرتگ و ماں یک نمدی/ نامه‌اِے وتی اپسوز اش درشاں کرتگ.
علی مطهری چه پارلمانءِ کارمستری دیوانءِ باسکاں، اهل‌سنتءِ جهگیرانی گلّه، په حق زانتگ و چه ایرانءِ صدا و سیمایا لوٹتگ که اهل‌سنتءِ عقیده و باورانی هیالداریا بکنت.
همے پیم اهل‌سنتءِ عالم و زانتکار و عام مردماں وتی گلّه و بیزاری چه مهران مدیریءِ اِے رڈّیں کارا درشاں کرتگ و چه آ ناسرپدا لوٹتگ که باید چه وتی اِے سلّیں کارا توبه بکنت و چه اهل‌سنتا پهلی بلوٹیت.
ماں اِیرانءِ ٹلویزیونا صحابیانی بدگوشگ نوکیں کارے نهنت، گوں اِشی که ملکءِ رهشونا باز برا تاکید کرتگ که صحابی بدگوشگ مبنت، بلے اپد هں لهتے ناسرپد پاد کئیت و صحابیانا بد گوشیت.
حضرت طلحه و زبیر رضی الله عنهما، دو صحابه چه پیگمبرءِ مزن‌شانیں یاراں بوتگنت که په اسلاما باز مهنت‌اِش کرتگ. اهل‌سنتءِ عقیده و باورا پیگمبرءِ تمامیں صحابه عادل بوتگنت و الله ئا وتی رضایت و وشنودی چه آیاں اعلاں کرتگ.