نیویورکءِ شهرءِ «الفرقان»ءِ جامع مسیتّءِ پیشنماز ترور کنگ بوت

مولانا علاءالدین آخونجی، «الفرقان» جامع مسیتّءِ پیشنماز گوں وتی همراه «صرام‌الدین» گوستگیں شنبه 23 مرداد 1395، ءِ بیگاها گوں یک ناشناسیں مردے تیرگواریا بیراں کنگ بوتنت.
په سنی‌آنلاینءِ هالکاریا نقل چه ڈنی رسانکدراں، یک سلاه‌بندیں مردیا وهدے که مولانا آخونجی چه مسیتّا دیم په وتی گِسا روگ اَت آئی سرا تیرگواری کرت و شهید کنائینت.
روتاک «دیلی‌نیوز» ئا نبشتگ: اِے واجه که منطقه «کوئینز»ءِ مردمانی کرا سک احترامی بوتگ وهدے که گوں وتی سنگتا چه مسیتّا دربوتگ و دیم په وتی لوگا روگ بوتگ آئی سرا تیرگواری بوتگ. مهاجم یک نپرے بوتگ و شتگ و آیانی نزیکیا چه تیر گواری کرتگ.
رند چه اِے پیشامدا لهتے چه نیویورکءِ مسلماناں وتی اعتراض پیش داشتگ و مولانا آخونجیءِ بیراں کنگ سک اِیرجتگ و گوشتگش که مولانا آخونجی په وتی مذهب و دینءِ واستا شهید کنگ بوتگ.
همے پیم مسلماناں چه «دونالد ترامپ»ءِ گپاں سک گله کرتگ و گوشتگش که آئیءِ گپاں اسلامی بیم و ترس مردمانی دلا دور داتگ.
مولانا آخونجیا 55 سال بوتگ و سَے زهگی هست. آئی بُندرا بنگلادشءِ مردم بوتگ و دو سال پیش گوں وتی جن و زهگاں ماں نیویورکا یهتگ و په «الفرقان»ءِ مسیتّءِ پیشنمازیا گچیں کنگ بوتگ.
پیسر چه اِشی هں امریکهءِ بازیں جاهیا مسلمانانی سرا حمله بوتگ و یک ماهے پیش دو نوک‌ورنا ءِ سرا حمله بوتگ و سک ٹپّی کنگ بوتگنت. همے پیم یک ڈاکٹرے هں کمے پیسرترا «هيوستون» ءِ شهرا «تگزاس»ءِ ایالتا سَے ناشناسیں مردا ٹپّی کرتگ.