زاهدانَے مکّی مسجدَے قرآن مجیدَے ختمَے دیوان برجم دارگ بوت

زاهدانَے مکی مسجدَے قرآن مجیدَے ختمَے دیوان ماں تراویحَے نمازا دوشی رمضان‌المبارکَے بیست‌ونهمی شپا ماں زاهدانَے جمعه‌یَے نمازجاها برجم دارگ بوت.
په “سنی‌آنلاین” ایرانَے اهل‌سنتَے هال‌رسانی سایتَے هالکاریا ماں اِے دیوانا قرآنَے عاشق و دوستداروک چه بلوچستانَے هر نیمگا ماں اِے دیوانا سر بوتگتنت، زاهدانَے نمازجاه و آئی‌ِیَے کِرّ و گوری روڈ و سڈک چه مردماں پر بوتگنت.
اِے دیوانَے اولی بهرا واجه مولوی عبدالله ریگی دارالعلوم زاهدانَے استادا صحابه‌یَے مزن‌شانی باروا گپ کرت و په صحایه کرامَے تابعداری و رندگیری ماں زندگی ‌یَے هر پڑ و میدانا تاکیدی کرت.

?دیوانَے اصلی بهرا رند چه عشا (خُپتن) و تراویحَے نمازا گوں واجه شیخ‌الاسلام مولانا عبدالحمیدَے گپاں بنگیج بوت.

مولانا عبدالحمیدا ماں وتی گپاں بازیں پنت و نصیحتےکرت، واجه‌ئَے گپانی درجتگیں بهر اِشنت:
▫️قرآن مجید بے مَٹّیں کتابے، مردماں هدایت و رستگار کنت و چاگردا بدلّین‌اِیت. ماں قرآنان هچ شک و شبهه اے نیست اِنت.
▫️قرآن مجیدا وتی تمامیں مخالف دعوت داتگنت که اگه شما را په قرآنَے حقانیتا کمّکیں شکّے هست، گڑا شما یک آیه‌اِے چو قرآنا بیارت. ابوجهلا نتوانت و تا مرچی هچکس نتوانیت یک آیه چو قرآنان بیاریت.
▫️آ ملتے که قرآن و سنت و کاملیں دینَے واهند اِنت آ نباید گوں مشکلاں و آپتاں دپ کپیت، بلے مرچی اپسوز اِنت امت اسلامی گوں مشکل و آپتاں دپ کپتگ.
▫️دینَے سرا استقامت سک مهم اِنت، روایات تها یهتگ پیگمبرا پرمائینت: منا سوره «هودا» پیر کرت. حضرت ابن عباس گوشیت: اِے سورتا آیه «فاستقم کما أمرت» یهتگ و پیگمبرا مراد همشنت که همے آیتا منا پیر کرتگ. منی طالبی فهم گوشیت: الله تعالایا ماں اِے سورتا گوستگیں قوم و راجانی ناپرمانی ذکر کرتگنت که آ هما سببا گرپتار بوتگنت، پیگمبرا هں وهدے که اِے سوره وانت و گوستگیں قومانی هالاتی یاد کتنت، گڑا واجه‌ها ترسِت که چو مبیت یک وهدے منی امت چو هما گوستگیں امتانی دابا الله‌ئَے ناپر مانیا بکنت و گوں الله‌ئَے عذابا گرپتار ببیت.
▫️تمامیں بُحران و آپتانی علت همشنت که مسلماناں الله چه وت ناراض کرتگ و الله‌ئَے حکم و فرضانی تها سستی کننت. مرچی چاگردَے تها نمازَے باروا باز سستی بیگ اِنت، نماز الله‌ئَے ٹوه تریں حکم اِنت.
▫️ما تماماں گوں وت دینی، ملکی و اسلامی براتیں. نباید مئے درمیانا قومی و راجی جنگ و درگیری ببیت. قومی جنگ اسلاما چه پیسری عادت و رسم بوتگنت و پیگمبرا په ترندی رد کرتگنت.
▫️مئے ورنا باید په وت شرین و همیشگی کار و دَندا در بگیج اَنت. بےپائده و غیرقانونی کارو دندایاں ویل دینت.

?گڈسرا اِے دیوان گوں واجه مولانا عبدالحمیدَے دعا و پریات و مردمانی آمین گوشگا هلاس بوت.