حضرت ابوبکرءَ وتی مال و جان په پیغمبرءَ نَدر کرت

واجه مولانا عبدالحمیدءَ ماں زاهدانءِ جمعهءِ نمازءِ دیوان حضرت ابوبکر صدیق رضی‌الله‌عنهءِ زندگیءِ بارهءَ گپ جت و گوشتی: حضرت ابوبکر، هما اَت که وتی مال، جان و راحتی په پیغمبر صلی‌الله‌علیه‌وسلم ءَ ندر و قربان کرت.
په سنی‌آنلاینءِ هال‌رسانی سایتءِ هالکاریءَ واجه مولانا عبدالحمیدءَ ماں زاهدانءِ جمعهءِنماز (27 فرورnین 1395)ءَ گوشت: حضرت ابوبکر صدیق رضی‌الله‌عنهءِ بُرز و مزنیں مقام و جاگاه چه هچکسءَ چیر نه اِنت. حضرت ابوبکر هما اَت که وتی مال، جان و راحتی په پیغمبرءَ ندر و قربان کرت.
واجهءَ دیمءَ گوشت:‌ پیغمبرءَ ماں هجرتءِ سفرءَ حضرت ابوبکر صدیق، په وتی همراهیءَ گچیں کرت، حضرت ابوبکرءَ هں ماں اِے سفرءَ په دل چه واجهءَ دیمپانی کرت و واجهءِ هزمتی کرت.
دارالعلوم زاهدانءِ مدیرءَ گوشت:‌ پیغمبر صلی‌الله‌علیه‌وسلم ماں وتی مبارکیں عمرءِ آخری روچاں منبرءِ سرءَ شت و دیم په صحابهءَ گوشتی: هرکسءَ که په من نیکی یے کرتگ من آئیءِ بدل داتگ به غیر چه حضرت ابوبکرءَ که من نتوانتگ آئیءِ عوض و بدلءَ بدیاں . الله وت آئیءَ مُزّ دیات.
واجهءَ دیمءَ په حضرت علی رضی‌الله‌عنهءِ قربانیاں هں اشاره کرت و گوشتی:‌ ماں هجرتءِ سفرءَ حضرت علی رضی‌الله‌عنه په پیغمبر صلی‌الله‌علیه‌وسلمءِ پرمانءَ ماں مکه مکرمهءَ مَنت، تا واجهءِ امانتانءَ تهبیل بدات، واجهءِ جاهءَ وپت تا هر آزارے که رسگیگ اَت آئیءَ برسیت.
واجهءَ گوشت: صحابه کرام، پیغمبرصلی‌الله‌علیه‌وسلمءَ تربیت کرت اَنت و په واجهءِ همراهیءَ آیانی مقام باز برز شت. ما هں باید چو همایاں دینءِ سرءَ عمل کن اِیں.
واجه مولانا عبدالحمیدءَ ماں دگه بهرے چه جمعهءِ گپاں چه اسلامی ملکانءِ راجکماشانی دیوانءَ ماں ترکیاءَ وتی شادی و گَلی درشان کرت و په اسلامی ملکانءِ مشکلاتءِ گیشّینگءَ تاکید کرت.
واجهءَ گوشت: باز شاد و گَل‌اِیں که اسلامی ملکانءِ کارمسترانی دیوان ماں ترکیاءَ برجم دارگ بوت. تمامیں مسلمان لوٹ اَنت که اسلامی ملکانی کارمستر گوں وت نزّیک به بنت و گوں شور و مذاکره اسلامی ملکانءِ مشکلاتءَ گیشّین اَنت و حل کن اَنت.
واجهءَ ایرانءِ راجکماشءِ گپ ماں اے اجلاس و دیوانءَ جوانیں گپ زانت اَنت و گوشتی: ایرانءِ راجکماش که ماں اِے دیوانءَ حاضر اَت باز جوانیں گپی جت و گوشتی سعودی عرب و ایران یکدگرءِ واستءَ بیم و مشکل نه اَنت، بلکیں جهان اسلامءِ مشکل نازانتی و تعصب، جنگ و درگیری اِنت. جهان اسلامءِ اصلی مشکل فلسطین و بیت‌المقدسءِ مشکل اِنت.
واجه مولانا عبدالحمیدءَ وتی گپانی گڈسرءَ گوشت: مرچی په پهکاں المّ اِنت که جهان اسلامءِ اصلی مشکل، اسرائیل و دگه زوراک اَنت که په وتی منافعءِ دستءَ یارگءَ مسلمانانءَ جنگ دینت. باید مسلمان گوں وت نند اَنت و په وتی مشکلاتءَ فکر کن اَنت.