جادوگرانی کِرّءَ روگ، ایمانءَ خطره تهءَ دور دات

واجه مولانا عبدالحمیدءَ گوں انتقاد چه خلاف شرعیں تعویذنبیسیءَ گوشتی که اشانءِ کرءَ روگ مردمءِ ایمانءَ خطره تهءَ دور دات.
واجه مولانا عبدالحمیدءَ ماں زاهدانءِ جمعهءِ نمازءَ (13 فروردین 1395/ 22 جمادی الثانی 1437)ءَ گوشت: الله تعالیءَ حضرت محمد امین صلی‌الله‌علیه‌وسلم، په ما اسوه و نمونه قرار داتگ. پیغمبرءِ تمامیں رپتار و عادت اللهءَ پسند کرتگ اَنت. الله تعالیءَ وت پیغمبر صلی‌الله‌علیه‌وسلم، تربیت و رهشونی کرتگ. پیغمبرءِ رپتار فطرتءِ مطابقءَ بوتگ. پیغمبر تا قیامت روچءَ په تمامیں متقی و خدا ترساں بهتریں نمونه و رهشون اِنت. باید ما ماں وتی تمامیں اعمالءَ چه پیغمبرءَ رندگیری کن ایں.
واجه مولانا عبدالحمیدءَ چه خلاف شرعیں تعویذنبیسی، سحر و جادوءَ گله کرت و گوشتی: برے هال رسیت که لهتے تعویذنبیس هست اَنت که په وتی دپارے نگن/لُنکه‌اےنانءَ مردمانءَ په بیراهیءَ کشّ اَنت. لهتے گهار هست اَنت همے که اِشکن اَنت فلان جا تعویذنبیسے هست هما دمانءَ وتءَ را سر کن اَنت و تعویذ گر اَنت، اِے شریں کارے نه اِنت، پرچے که بازینے چه اِے تعویذنبیساں شیاد و بے دین اَنت.
واجهءَ دیمءَ گوشت: لهتے دم و دعانبیسءَ وَ مردم مجبور کن اَنت که دم و تعویذے بدینت، بلے لهتے هست اَنت تعویذنبیسی اِش وتی کار و دندا کرتگ و هنچیں کار کن اَنت که شریعت اِش نه مَنّ اِیت.
ایرانءِ اهل‌سنتءِ مزنیں عالمءَ گوشت: هر که جادوگرانی کرا بروت تا یک جن و مردے در میانءَ جنگ و جتایی جوڑ بکنت آ وتی ایمانءَ چه دست دات. ما په سحر و جادوءِ نابودیءَ هں په قرآن و سنتءَ متوسل بئیں و چه اللهءِ ناماں مدت به لوٹ‌اِیں. پیغمبرءَ گوشت که په حفاظت چه سحر و جادوءَ دو سوره «معوذتین» (قل أعوذ برب الفلق- قل أعوذ برب الناس) رند چه هر نمازءَ وانگ به بنت. اِن شاءالله ضرور اے دوئیں سوره سحر و جادوءَ چه بین بر اَنت.
واجهءَ دیمءَ سحر و جادو گیشتر اِیر جت و گوشتی: سحر و جادوگری فسق و گناه اِنت حتی برے تا کفرءَ هں روت و رسیت. پیغمبراں په سحر و جادو ءِ گار کنگءَ باز جهد کرتگ. همے جادوگر بوتگ اَنت که حضرت موسیءِ دیمءَ اوشتات اَنت و همے پیم پیغمبر و صحابهءِ دیمءَ جادوگراں مشکلات اِش جوڑ کرت.

ما حقّ‌اِیں عرفان و تصوفءَ که شریعتءِ راهءَ بیت مَنّ‌ایں
واجه مولانا عبدالحمیدءَ دیمءَ تصوف و عرفانءِ بارهءَ اشاره کرت و گوشتی: تصوف و عرفان حقّ اِنت و رد کنگی نه اِنت. الحمدلله تمامیں عالماں راستیں تصوف باور اِنت و مَنّ اَنتی. بلے هما تصوف که شریعتءِ راهءَ به بیت و هما صوفی که شریعتءِ حکمانی سرا عمل به کن اَنت. دینی مسائلءَ همایانی کِرّ مراجعه کن اِت که شما را آیانی سرا اطمینان هست چو مه بیت که هما شیّاد و بے دینانی کرا برو اِیت که چه اهل‌طریقت و صوفیانی پچءَ کٹ و کمائی کن اَنت و په وتی دنیائی مقصداں جهد کن اَنت.
واجهءَ گوشت: ما گوں بدعات و وتساچیں کاراں مخالف‌ایں، بلے گوں عرفان و تصوف که شریعتءِ راهءَ بیت موافق‌ایں. تصوفءِ مزنتریں مقصد همش اِنت که شریعت، سنت و اخلاص و للهیت پیداگ به بیت. تصوف ماں اللهءِ ذکر و یات تقوا و پهریزکاریءَ خلاصه بیت.

شرعی لحاظءَ نباید چه چراگاهاں و چاهانی آپاں دیمگیری به بیت
واجه مولانا عبدالحمیدءَ گوں وتی گَل و شادیءِ درشان کنگ چه تازه‌ایں هور گواریاں و چراگاهانی سبز بیگءَ گوشتی: الحمدلله اے سالءَ زاهدانءَ هور باز بوتگ و چراگاه سرسبز اَنت و مالداراں زاهدانءِ کر و گوراں جمع بوتگ اَنت.
واجهءَ گوشت: ‌تمامیں چراگاه الله ئیگ اَنت. هچکس نتوانت که اولاک و مالانی دیمءَ چه چرگءَ بگریت. همے پیم چات و کانالانی آپ هں مشترک و هورین اَنت، پمشا هچکسءَ حق نیست اِنت که انسان و مالانی دیمءَ بگریت.

مولانا عبدالغنی نیکیں عالم، عابد و ذاکرے اَت
زاهدانءِ جمعهءِ پیشنمازءَ وتی گپانی گڈسرا په واجه مولانا عبدالغنیءِ اسماعیل‌زهیءِ وفاتءَ گوشتی: مولانا عبدالغنی نیکیں عالم، عابد و ذاکرے اَت. واجهءَ باز قرآن تلاوت کرت. تهجدوان و باتقوایے اَت. الله تعالی مرحومءَ وتی بهتریں رحمتانی چیرا جاه دیات و درجاتی بُرز کنات.