مسلماں هچ‌بر په ترندرویءَ رازیگ نه اَنت

واجه مولانا عبدالحمیدءَ ماں جمعهءِ وعظاں گوں اشاره په جهان و میاں‌رودراتک/ خاورمیانهءِ مشکلاتءَ و همے پیم دنیاءِ مزن‌واکانی بے‌پرواهی په مسلمانانی کُشت و کُوشءَ، په اِے جنگ و شدتانی گیشّینگءَ تاکیدی کرت.
په ایرانءِ اهل‌سنتءِ هال‌رسانی سایت «سنی‌آنلاین»ءِ هالکاریءَ شیخ‌الاسلام مولانا عبدالحمیدءَ ماں وتی جمعه (6 فروردین 1395)ءِ گپاں گوشت: جنگ و بمب‌گواریءَ پائده نے، بلکیں بهتریں راه په دنیاءِ جنگ و شدتانی گیشینگءَ مذاکره، شور، ملی حکومتءِ تشکیل دیگ و مردمانی گپءِ گوشدارگ اِنت. تا وهدے که دنیا په عدالت و انصافءِ برجم دارگ و په مردمانی حقءِ داتنءَ تیار مبیت ناامنیانی دیم گرگ نه بیت.
واجهءَ گوشت: جنگ و شدت هرابی کاریت و سوب بیت که بے گناهانی هون ریچگ به بیت. باید فلسطینءِ مردمانی گپ گوشدارگ بیت و آ باید په عدالت و برابریءَ به رس اَنت.
زاهدانءِ جمعهءِ پیشنمازءَ گوں تاکید په اشیءَ که مسلمان گوں افراط/ترندرویءَ مخالف اَنت گوشتی: هچ‌بر مسلماناں په ترندرویءَ رازیگ نه اَنت، بلکیں هرجا ترندرویءَ ملامت کن اَنت.
واجه مولانا عبدالحمیدءَ نظامی جنگ و اُرش «قرون وسطایی / میانی سدیانی دورءِ هیل و عادت» زانت و گوشتی: ما باز برا گوشتگ و دگراں هں گوشتگ که جنگ و شدتءَ مرچگیں دنیاءَ جاهے نے. نظامی حمله و اُرش میانی سدیانی دورءِ هیل و عادت بوتگ و هنوگیں سدی و دورءَ جاهے نیستنی.
دارالعلوم زاهدانءِ کارمسترءَ ماں یک بهرے چه جمعهءِ گپاں بلژیکءِ نوکیں بمب‌تراکی که بازیں مردمے کشگ بوت، اشاره کرت و گوشتی: انتحاری حمله‌اے که تازه‌یاں ماں بلژیکءَ پیش آتک اَنت و بازینے بیراں بوت مسلمان و بلکیں تمامیں انساں متاثر و اپسوزی بوت اَنت.
واجه مولانا عبدالحمیدءَ امریکه و دگه مزںواکانی ردیں/غلطیں سیاست په تروریزمءِ دیم‌گیریءَ اِیرجت و گوشتی: امریکه و دگه مزںواکاں سک غلط و اشتباهءِ تهءَ اَنت که وتی مَنّءَ توان اَنت گوں نظامی ارش و حمله یاں اے مردمانی دیمءَ بگر اَنت. اے غلط و ردیں سیاستے و بدتر تروریزمءَ گیش کنت و ماں منطقهءَ افراط و ترندروی یاریت و جهانءِ امنیتءَ برهم جنت.
واجه مولاناعبدالحمیدءَ په امریکهءِ پیسری تبه‌کاری ماں میاں رودراتکءَ اشاره کرت و گوشتی: امریکه و آیاں که گوں آئی تپاک اَنت پیسرءَ اوگانستان و عراقءَ اُرش کرت، گڑا آیانی تهنائیں کٹ همے بیت که اے ملک ناامن و تباه بوت اَنت.
همے پیمءَ واجهءَ گوں اشاره په سوریا، یمن و عراقءِ بارهءَ گوشت: سوریا، عراق و یمنءِ مردم گوں وت تپاک به بنت و به نند اَنت و گوں وت شور و مذاکره بکن اَنت تا یک سرتاسریں حکومتے تشکیل بدینت. ڈنی مزن واکاں هں آیانءَ اجازت بدینت و کمک اِش کن اَنت تا وتی گِروکشّ و اختلافاتءَ حل کن اَنت.

دیمی جمعهءَ چه شهر در مه بئیت
زاهدانءِ جمعهءِ پیشنمازءَ گوں اشاره په اشیءَ که دیمی جمعه 13 فروردین اِنت و زمانگی رسمے هست که مردم چه شهرءَ در کاینت، گوشتی: فروردینءِ سیزدهمی روچ، جمعهءِ روچ اِنت آ که ڈن چه شهرءَ رو اَنت جمعهءِ نمازءَ پشت کپ اَنت. پیغمبرصلی‌الله‌علیه‌وسلمءَ گوشتگ آ کسے که دو جمعهءَ په رد بوانیت آئیءِ دوئیں هپتگءِ در میانءِ گناه بکشگ بنت. گڑا شما جمعهءِ نمازگچین کن اِت و بهر زور اِت. آ روچی جاده و راه شُلُکّ/شلغ اَنت و باز تصادف و خسارات پیش کئیت.

بهتریں توشگ تقوا اِنت
واجه مولانا عبدالحمیدءَ ماں دگه بهرے چه وتی جمعهءِ گپاں گوشت: بهتریں توشگ تقوا و خداترسی اِنت. مه شموش اِت که تقوا نجات و بَچّگءِ سوب بیت. الله تعالیءَ گوشتگ:‌«وَتَزَوَّدُواْ فَإِنَّ خَيْرَ الزَّادِ التَّقْوَى وَاتَّقُونِ يَا أُوْلِي الأَلْبَابِ» ما و شما پهکاں اللهءِ نیمگءَ مسافر ایں و دیم په آخرت و حساب و کتابءَ روگا اِیں. مئے دیمءَ جنت و جهنمے هست. بهتریں توشگے که اللهءَ رازیگ کنت و ما را په دنیا و آخرتءِ نگبهتی و سعادتءَ رسیینت آ تقوا و اللهءِ حکمانی سرا عمل کنگ اِنت.