گپ و ترانے گوں اسلامءِ توارءِ پُلّیں وانوکاں

تعریف و ستا هما بےمَٹ و بےدَروَریں اللهءَ زیبدار اِنت که انسانانی وڑوڑیں زبانانی جوڑ کنوک اِنت.
پاکیں اللهءِ شگرءَ گراِیں که مئے عمرءِ سباهی گیش کرت اَنت تا بلوچی تاکبند «اسلامءِتوار» ءِ نوکیں نمبرے په شما پُلّیں وانوکاں تیار کناِیں. باز گَل و شاداِیں که مرچی «اسلامءِتوار»ءِ نوکیں تاک شمئے لوگانی مهمان اِنت.
هما پیم که شما واجهیں وانوک بلکیں وت هں زان اِت «اسلامءِتوار» وهدتاک گوں دارالعلوم زاهدانءِ طالب و دَربروکانی جُهد و کوششءَ چاپ و شنگ بیت.
اسلامءِتوارءِ نوکیں تاکبند که شمئے دستءَ اِنت، هشتمی نمبر اِنت. اسلامءِتوارءِ اولی تاکبند 1431 هجری قمریءِ رجب ماهءَ شنگ بوتگ. بزاں مرچی هپت سال چه اسلامءِتوارءِ عمرءَ گوستگ و اللهءِ شگر اِنت که انگت اسلامءِتوار، بےتوار نبوتگ. آ اولی واجه که اِے تاکبندش بُنرد کرتگ، دیر اِنت وانگاِش دَربُرتگ و چه زاهدانءَ شتگ اَنت، بلے آیانی اِے جهد انگتءَ پشت کپتگ و دیمءَ روان اِنت، الله تعالی آ واجهانی مُزّءَ وت دیات. مئے امیت همش اِنت که نوکیں طالب و دربروک اے جهدءَ دیمءَ بر اَنت.
گپ باز اَنت چه آیاں من چنت گپ درچتگ:
اولی گپ
اولی گپ واجهاں همش اِنت که مرچی بلوچی زبانءِ یادگرگ په ما سک مهم و ضروری اِنت، پرچا مئے ماتی زبان اِنت. هما داب که مات دوست دارگیگ اِنت، همے پیمءَ ماتی زبان هں دوست دارگ و سمبالگ لوٹیت. پارسی گوشنت: «پشت کردن به زبان مادری کمتر از پشت کردن به مادر نیست»؛ بزاں ماتی زبانءَ پُشت مان دیگ چوش اِنت که مردم ماتءَ پشت مان بدات. بچاریں دگراں په وتی ماتی زبانءَ چه اندازه جهد کرتگ، ما شما چے کرتگ؟
مرچی ما را اِے ترس نے که بلوچی زبان گاروبیگواه بیت، بلکیں ما را اِے ترس و بیم اِنت که بلوچی زبان هنچینانی دستءَ بکپیت که په بلوچانی دین و آیانی گوستگیں دود و ربیدگ ءَ هچ پرواه اِش نے. مئے بیم چه همایان اِنت که په بلوچ راجءَ دنتانش تیز کرتگ و لوٹ اَنت بلوچانءَ وتی راه و رهبندءَ کش اَنت.
من اِے گپ په وش گپی نهجت اِے بارهءَ گیشتر فکر کن اِت اِشیءَ هما مار اَنت که بلوچانی ورنایانی هالاِش گور اِنت و زان اَنت دنیاءَ چے بیگ اِنت.
دومی گپ
بلوچی دینی واجه و عالمانی جُهد و کوشست په بلوچی زبانءِ دیمرویءَ چه هچکسءَ چیر نهاِنت، منی هیالءَ اگه تا مروچی بلوچی زبان پشت کپتگ و نامے چه آئیءَ هست همے واجهانی جهد و کوششانی بر و ثمر اِنت. آ که چمی چپت اَنت و گوشیت دینی واجهاں په بلوچی زبان هچ نکرتگ، بزاں آئی چه انصافءِ کِشکءَ دَر اِنت. اے گپ من اولءَپمشا دیمءَ آرت که تماماں بزان اَنت بلوچی زبانءِ گوستگیں دور گوں دینی واجه و زانتکارانی جهد و کوششءَ مُهر گرنچ اِنت و هچکس سستی نه کنت. و همے پیمءَ مئے نوکیں واجه و دینی وانندهیاں په بلوچی زبانءَ گیشتر دلگوش کن اَنت و وتی پیشی واجه و زانتکارانی پدءَ گام جنان کن اَنت.
سومی گپ
دگه گپے عربی و پارسی آبانی زورگ اِنت. مرچی لهتے نوک ورنا جهد کنگ اَنت که عربی و پارسی آب چوش «خ، غ ق و…» چه بلوچی زبانءَ کَشّ اَنت. اے نوک باهندیں واجهانی کار په بلوچی زبانءَ مزنیں تاوانے. مئے سوج په اِے واجهاں همیش اِنت که کمے دلءَ پراه کن اَنت و بلوچی زبانءِ سرا رحم کن اَنت. بلوچی زبانءِ بدواهانی لوٹاں پوره مکن اَنت.
چهارمی گپ
«ما بلوچی نزانیں» اگه اے گپءَ یک دگه راجے مردم بکناَنت پُجّگیگ اِنت، بلے اِشی که بلوچے پاد بیئیت و بگوشیت هچ پیمءَ باور کرت نکنت.
گڈی گپ
اسلامءِتوار په دیمرویءَ شما واجهانی سوج و شَورانی محتاج اِنت ما را گوں وتی چمشانک و نبشتانکاں کمک کن اِت.
شاکر رئيسي
سرچمگ: اسلامءِتوار هشتمی نمبر