زهگانی تعلیم و وانینگ مئے سرا واجب انت

شیخ‌الاسلام مولانا عبدالحمیدءَ، چوک و زهگانی تعلیم و وانیگ په پت و ماتاں یک واجبے و ضروری ئیں کارے زانت و په اشیءَ تاکیدی کت.
په سنی‌آن‌لاینءِ هالرسانی سایتءِ هالکاریءَ زاهدانءِ جمعهءِ پیشنمازءَ ماں اے هپتگءِ جمعه(27شهریور 1394)ءِ گپاں گوں اشاره په مدیری/دولتی مدرسه و دَربَرجاهانی بنگیج بیگءَ گوشتی: مئی استان سیستان و بلوچستانءِ وانگی و تحصیلی درجه و رتبه سک جهل انت. من شما را تاکید کناں که په وتی زهگانی تعلیم و تربیتءَ اهمیت دئیت. شمئے زهگ باید مدرسه و زانشجاهاں برو انت و مزنیں علمی مدرک و سند دستءَ بیار انت. بے علم و زانتءَ دیمرویءِ دستءَ آرگ ممکن نه انت. بزان ات که زهگانی تعلیم و تربیت مئے سرا واجب و ضروری انت.
جهان اسلامءِ جاوَر/حالات سک نگیگ و دردناک انت
شیخ‌الاسلام مولانا عبدالحمیدءَ ماں دگه بهرے چه وتی گپاں جهان اسلامءِ مرچگیں جاور/حالات خاصکار سوری آوارگانی هال سک نگیگ و دردناک زانت و گوشتی: جهان اسلامءِ مرچگیں حالات خاصیں حالتے. جنگ و گِروکشّان که اسلامی ملکاں راه کپتگ انت و سبب بوتگ انت که بازینے په یورپ/اروپائی کشوراں در کپ انت، اے جاور سک دردناک و اپسوزی انت.
واجهءَ دیمءَ گوشت: یک زمانگے هست ات که اے مسلماناں که مرچی آواره و درانڈیه بوتگ انت ماں وتی ملکانی تها گوں امنیت و آرامش زندگی اش کت، بلے مرچی بازیں مشکل و سکی یے تحمل کن انت و یورپی ملکاں پناه گر انت.
واجهءَ جهانءِ مَزن‌واک/ابرقدرت ، اے هراب کاریانی عامل زانت انت و گوشتی: اپسوز انت که سازمان ملل و دنیاءِ مزن واکاں به جاه اشیءَ که په اے مشکلات و نگیگیانی بیگواه کنگءَ گام چست بکن انت و گوں مذاکره و صلاح مردمانءَ آرام بکن انت، بدتر جنگءِ ڈهلءَ جن انت و لوٹ انت جنگءِ آسءَ ماں منطقهءَ گیشتر بکن انت.
واجهءَ ماں اے بهرءِ گپانی آسرءَ گوشت: بایدمسلماناں ماں اسلامی ملکاں تپاک بوتین انت و وتی مشکلاتش گوں مذاکره و شور حل و فصل کتین انت. جهان اسلامءِ عالم و زانتکاراں باید په وتی توانءَ په امتءِ مشکلاتءِ حل کنگءَ دیمءَ بکنز اتین انت، بلے اپسوز انت که چوش نبوت.
اسرائیلءَ چه اسلامی ملکانی گروکشاں مُوه/فرصت رستگ که هراب کاری بکنت
زاهدانءِ جمعهءِ پیشنمازءَ ماں دگه بهرے چه وتی جمعهءِ گپاں په اسرائیلءِ نوکیں کارهرابیاں اشاره کت و گوشتی:. اے روچاں اسرائیلی غاصبیں صهیونیستاں وتی جمله و ارش فلسطینی مسلمانانی سرا گیشتر کتگ انت. اسرائیلءِ مزن وزیرءَ پرمان داتگ که ڈوکءَ گوں تیرءَ جواب بدینت، گوں اشیءَ که دنیاءَ هچ جاگه چوش کنگ نبیت.
واجهءَ دیمءَ گوشت: اسرائیلءِ ظالمیں مُلک‌گر چه اسلامی ملکانی اختلاف و درگیریاں په وتی هرابکاریءَ بهر زیرگءَ انت و لوٹ ایت که چه فلسطینی مسلماناں بیر بگریت.
واجهءَ وتی گپانی آسرءَ مسلمان په تپاکی و وحدتءَ دعوت دات انت.
ذوالحجهءِ اولی ده روچ په اللهءِ عبادتءَ وشّیں موسم/فرصتے
واجه مولانا عبدالحمیدءَ زاهدانءِ جمعهءِ نمازا وانوکانی دیوانءَ گوشت: نگبهتیں انسان چه اے ذوالحجهءِ روچاں په الله تعالیءِ عبادت و بندگیءَ بهر زیر انت و په وتی کمّیانی جبران کنگءَ کوشش کن انت، تا گوں الله تعالیءَ نزیک‌تر به بنت.
واجهءَ رند چه سوره «الفجر»ءِ اولی آیاتءِ وانگءَ گوشت: الله تعالی ماں اے آیاتءَ په عرفه یا عید روچءِ سباهءَ و رندءَ په ذوالحجهءِ اولی ده‌شپءَ سوگند یاد کنت که چه اے سوگندءَ اے روچانی اهمیت و ارزش زانگ بیت. ماں اے روچاں بازیں مسلمانے چه دنیاءِ مختلفیں جاهاں په حجءِ ادا کنگءَ «حرمین شریفین»ءَ رهادگ انت تا الله تعالی ءِ لوگ و پیغمبرصلی‌الله‌علیه‌وسلم،ءِ پاکیں قبرءِ گورءَ الله تعالیءَ عبادت بکن انت.
واجهءَ وصیت کت: ماں اے روچاں الله تعالیءِ عبادت، ذکر و بے‌وسانی حال‌چونی ءَ بازیں مُزّ و ثوابے هست. اے ده شپءِ عبادت ءَ شپ قدرءِ ثواب هست. و هر روچءِ عبادتءَ یک سالے ثواب رسیت و عرفهءِ روچءِ روچگ دارگءَ دو سالءِ مز و پاداش هست انت.
واجهءَ وتی گپانی آسرءَ په عیدءِ روچءِ اعمال و عبادتاں اشاره کت و گوشتی: عیدءِ نماز و قربانیءِ کشگ، عیدءِ روچءِ مزنتریں اعمال انت. تکبیرات تشریق که نهمی روچءِ سباهءَ شروع بنت و تا سیزدهمی روچءِ بیگاه هں رند چه فرضی نمازاں گوشگ به بنت. مردیناں برز اش بگوش انت و جنینان میزان.