رمضانءِ وشیں موسم

با برکتیں رمضانءِ ماه هما وشیں موسم إنت که اللهءِ نیکیں بندگاں همک وهدا آئیءِ  ودار و انتظارءَ نشتگ أنت که کدی إے بهارگاه برسیت تا په وتی نفسءِ پاک وصاف کنگءَ بهر بزیر أنت و گیشتر گوں اللهءَ نزّیک بنت.

مروچی ودار کنوکانی ودار و انتظار آ سر بیت بابرکتیں رمضانءِ تپوکیں شهماں  تپگءَ لگ إت أنت وچه هر نیمگءَ إے توار گوشءَ رسگیں که مبارک بات شمارا رمضانءِ ماه، مبارک بات شمارا إے نوکیں بهارگاه، مبارک بات شمارا إے تازه إیں پلءِ پچ پُلگ.
مروچی برکت و رحمتءِ رگاماں گوارگءَ لگتگ أنت و چه هر نیمگءَ داد ودهش ءِ گل و پل رچان أنت و بکشگ و آزاتیءِ دروازه پچ کنگ بیتگ أنت.
جی هو! إے هما وشیں موسم إنت که اللهءِ نیکیں بندگان په آئیءِ ودارءَ نشتگ إتنت و جست إش کت باریں چینچو روج په رمضانءَ بچتگ…؟
مروچی گوں إے نوکیں نوکءِ گندگءَ آیانی ودار سر رست و آیاں گوں گل وشادی ماں رمضان مبارکءِ دیمءَ شت أنت.
رمضان مبارک هما ماه إنت که الله تعالی وتی خاصیں خیر و برکتاں په انسانان گوارینیت، الله تعالی وتی رحمت، مغفرت و جهنم آسءِ بچگءِ درءَ پچ کنت هماپیمءَ که درّیں پیغمبر- صلی الله علیه وسلم پرمائینت:هو شهر أوله رحمة ، وأوسطه مغفرة ، وآخره عتق من النار.
ماں إے وشیں بهاری موسمءَ الله بندگاں په آئیءِ حکمءَ ماں إے گرماگی دراجیں روچاں چه بامگاه تا بیگاه شدیگی وتنگی کشّ أنت، شپاں تا پاسے لک پاد اوشتاتگ أنت تا که اللهءَ بندگی کن أنت و آ پاکیں ربءَ چه وت راضیگ و خشنود کن أنت.
ماں إے بهارگاهءَ قرآن پاکءِ وشیں توار چه هر ملک و دمگءَ چست إنت، مردین وجنین، پیر و کسانءَ اللهءِ پاکیں قرآن دستءَ گپتگ و آئیءَ گوں غور وپگر وانگ أنت، تا چه آئیءِ رژنءَ په وتی زندءَ چراغے روژن کن أنت.
إے هما موسم إنت که سِل کاریں بندگاں، هما که وتی  عمر إش ماں تباهی، گناه و سرپیجیءَ گوازینتگ، چه وتی کتگیں کاراں شومان بنت وگوں گریوگ و أرس ریچگ اللهءِ نیمگءَ پچ تر أنت.
إے موسم داد ودهشءِ موسم إنت ماں إے موسمءَ مسلماناں وتی مال و پولءَ گوں فقیر ومسکین وجنوزاماں بهر کن أنت تا که گوں دستءِ پرمشگ آیانی سرءَ وتی ربّءَ راضیگ کن أنت.
إ ے ماه برابری و تپاکیءِ ماه إنت که پهکیں بندگ، سیٹ وغریب، مالدار و بے مال ماں یک سبره إے سرءَ نند أنت و دپ بوج أنت و ماں یک صفے اللهءِ بارگاهءَ اوشت أنت و نماز کن أنت.
امیت ایں که ما هں چو إے دگه مسلماناں چه إے بهارگاهءَ وتی سیت ونفعءَ بگر إیں.