“رب ء دیدار”

من به اَرواحا گِران قَیومءِ شُکرُ و مِنَّتا
باطِنا تحقیق جَزمان کِبریای ء وحدتا

هچ نیاران خاطِرا شکّی خدایء قدرتا
بی مثالین ذاتی پاکین چه شک وشُبهَتا
آئی رحمت شاملینت هر جا په حیّ و مَیِّتا
سَر مِنی نَدرینت په اسلام ورسول سُنّتا
مئی سَرا آتکه محَمّد اَز برای رحمتا
پاکینت از کِذب و کَلاگُ و شِعر و سِحرو تُهمَتا
مُعجزین فُرقانی آرتَگ بر دلیل و حُجتا
چهار یارااِنت مصطفی ئءلائق وصف و سَتا
اَوَّلی صدیق اَکبر گون بُزُرگین خِصلَتا
هَمنِشینَت حضرتءِ دَر وقتِ حَذَر و راحتا
عُمَّرینت دومی که مشهورَت به نیکین عادتا
برقرارَت در خلافت تا به راه شَریَتا
حضرت عثمان به مَردی و سَخا وهَمتا
گروهی بُرتَگ اَز جَهانا دَر حَیا و غِیرَتا
شاه مردان چارُمیگینت شاه تَختِ لا فَتی
آئی مَدحا کافیّنت شان نزول هَل اَتی؟
رَبِّ ء رضا بات اَز رسول الله آل و عِترَتا
بعد از حَمدِ خدا و مصطفی ایی مَدحَتا
گُوش بِداریت عاقلین مَردان بَرایِ عِبرَتا
کاملین انسانءَ زانَنت قَدرءِ اِنسانیَّتا
آ که حیوانینت نَزانیت اِنسانی قَدرُ و قیمَتا
زود کَنیت آگاه بِبیت مردان چه خواب ء غِفلَتا
زندگی مَردان پُلیت توبه چه موتءِ مِحنَتا
ناگهانا کِیت چو هارُ وبی گمانُ و بیگتا
توبه توبه قبر ظلمات و عذاب و وحشتا
اَلاَمان یا رب چه حَشر ونَشرُ گِرانین دِهشَتا
ائی حکایت در قرآنا ثابتینت صَد آیتا
مَه همان روچی که مخلوق جمع بیت در قیامتا
مُچ کَنت باری تعالی بیشمارین خلقتا
هر کسی دل کَپ بیت اودا چه هول و هیبتا
مات و پِت چوکان شِزارن چوک چه ماتا و پِتا
حق تعالی وَت خبر دارِنت دِلانی نیَّتا
آ که بیتَگ تابع نفس و هوی و شَهوَتا
دروغ و دُزیُّ و زِنا و مَسخرا و غیبتا
ظلم و زور ونِخوتُ و نازو رِبا و رِشوتا
کَنت بغض و حسد وفسق وراه ء بدعتا
ائ تمام اودا گرفتارِنت به درد وآفتا
دوزخی در دوزخا زاری جَنَنت وا حَسرَتا
ما نَکُرت نیکین عمل دنیا ءِ دور و نوبتا
غافل و مغرورتین شومین جهان ءِ مُهلَتا
کافرا نیستین خلاصی چه عذاب ءِ شدَّتا
تا اَبَد دَر دوزخا اِنت مُستَحَقِنت لعنتا
هر کسی که داخلینت اِسلام ءِ دین و مِلَّتا
شَک نهینت پیغمبران و رَب ءِ وحدانیّتا
آ کَسانَ الله بَخشیت جاگَهِش دَنت جنَّتا
رَب هَمودان چِست کَنت بُرزان لَوایءِ رَحمَتا
وَت گناهکاران مُعافی دَنت چه رحمانیّتا
ما امیدوارین خدا تئی بار گاها اَلبتا
ائی خبر هستینت حدیثا چو بِگوشتَگ حضرتا
مَحشرا مردم که گیشِنت جُستُ و پُرسُ و زحمتا
دوزخی در دوزخا بِنت و بهشتی جنتّا
جنتی مشغول بِنت اودا به عیش و عشرتا
بَزمُ و بُوپان په مرادی لَیبُ دارَنت لعبتا
جبرئیل بر حکم و فرمان ء جلیل القدرتا
کیت به پیش حضرتا دَستان بَندیت خِدمتا
یا رسول الله مَروچی بیا خدای دعوتا
در حُضیرُ القَصر باغا بیا به خیر وصِحّتا
مصطفی پوشیت په بالادا خلیلی خَلعَتا
ایر کَنت بالای فَرقا تاجِ ء محبوبیتا
سُندُسی سَبزین حُلَل زیبَنت حبیبءِ قامتا
جبرئیل هَشتین بِهشتا گوانک جنت سه کُرتا
مومنا بیائت مروچی ذوالجلال ء زیارتا
جنتی یکی کَننت شَور و تُپاک و سَنتا
گون بهشتی حُلَّتا کاینت به زیب و زینتا
لَک و بیست وچار هزار پیغمبرَن گون اُمَّتا
جنتی بوران سُوارَنت درهُجومُ و حِشمتا
پیسَرینت حضرت رسول الله به شان و شوکتا
آئی اُمت پیسَرینت چه امتانی نِسبَتا
عَرش چیرا مُچ بَنت بر کردگار ءِ حکمتا
کُرسیان و مِنبران نِندَنت به قدر طاعتا
مصطفی صلوا علیه در مقام قُربَتا
از تمام پیغمبرا اعلی ترینت در رُتبَتا
حق تعالی یِه گوشیت اَز من بلوتیت حاجتا
هر کسی کاری که کَنت لوتیت کِریهُ و اُجرَتا
چو گوشَنت یا رب که تو وَت عالم ءِ مَئی نیّتا
ما تمامَ لوتین مَروچی تَئی رَضا و رَحمتا
تئی لِقائا تُنَگین لوتین وِصال ءِ شَربَتا
تو نَگُشته عاشقان گِندَنت مَنا دَر جنتا؟
وعده ها یا رب وفا کن پیش بِدار ما را وَتا
تو خدا ءِ عالِمه پاکِه چه شکل و صورتا
پاک بی چون کَنت تَجلی خَلق رو از حالتا!
ظاهرا گِندَنت جمالء پاک ربُّ العِزَّتا
بی مثال و بی جَهت بی چون و بی کیفّیتا
مَست بَنت مَدهوش بَنت رَبِّ لِقاءِ لِذَّتا
ساعتی پُرین کَپَنت در بیهوشی و حیرتا!
قصر و باغان بی خیالِنت بیخودِنت آ ساحَتا
چا مَزَن چَمین جَنان بُت رانَگَنت آ مُدَّتا
هرجُمعا گِندَنت خداوندا به قدر قوتا
نوجوانَنت نِشتَگَنت دائم به ناز و نعمتا
ایمِننَت اُودا چه مرگ و درد و رنج و علتا
تا اَبد عیش ءِ تهایَنت بی زوالین دولتا
عرض عبدالله ایشنت گو رب ء حیّ ء ثابتا
دست بَندن پیش ء پاکین مُستجیبا خَلوَتا
ما نَدارین ای خدایا تئی عذاب ءِ طاقتا
پَر وُتی شان ورحیمی و رسول برکتا
جنت الفردوس ء گُلزاران بِکَن مَئی کِسمَتا
تئی مبارکین لقاء و تئی دوست ماهین طلعتا