نوروز چه اهل سنتءِ منظر

بیرجندءِ مسجد النبیءِ رسمی وبسائٹ نبشتانکے په « نوروز و جایگاه آن در اسلام و ایران» نامءَ نبشتگ. ما اداں آئیءِ گُڈّی بهرءِ تَرّېنک (رجانک ءُ ترجمه)ءَ په مڑادارېں وانۏکاں پېشءَ کنېں:

نوروز چه اهل سنتءِ منظر:
چه آ جاهے که الله تعالی مئی سرءَ لطف کتگ ءُ اے هندءِ سرءَ هَورَے گْوارېنتگ ءُ پَٹّ ءُ کۏه سبز بوتگ‌اَنت، پیکه انسان اے مزنېں نعمتانی شکرءَ په جاه بیاریت . پمېشکا ماں اے رۏچاں په مسلمانېں شکس جائز اِنت که چه اے طبیعی‌اېں منابع استفاده ءُ وتی روحءَ آرامش ءُ آسودگی بدنت تا هما حدّے که اے فایده گرَگ زیاتیک مبیت که انسان چه وتی کار ءُ زندگی بکپیت ءُ چه وتی عبادتءَ نسرحال مبیت ءُ چه دگه نېمگے چه خدایءِ اے نعمتانی گِندگءَ درس ءُ اندرست بگیرت که  « إِنَّ الَّذِیْ أحْیَاهَا لَمُحْیِ الْمَوْتَیٰ » بے شک آ خدائے که اېشانَے زندگ کتگ مردگانی زندگ کنۏک هم هست‌اِنت.
هر مذهب ءُ دینے را دۏد ءُ ربیتے هست. ماں اهلِ‌سنّتءِ مذهب هما طورے که احادیث ءِ تها یَهتگ که حضرت انس رضی الله عنه فرمائشءَ کنت : پیغمبر صلی الله علیه وسلم ماں آ حالتے مدینهءِ تها آتک که مردمانءَ دۏ عید هست‌اَت که آیانی تۏکءَ شادی‌اِشءَ کُت . رسول الله صلی الله علیه و سلم جُست کُت : اے دوېں رۏچاں چے اَنت؟ گْوشتِش : جاهلیتءِ دۏ یاتگار اَنت. واجه فرمائش کُت : خداوند اشانی بدلءَ دۏ گِهترېں رۏچ شما را داتگ که عید قربان ءُ عید فطر اَنت.
پمېشکا ما اهلِ سنّت ءُ جماعت په عیدءِ عنوانءَ هر سالے تهنا دۏ عید دارېں که یکّېں عید فطر اِنت ءُ دۏمی عید قربان که اے دوېنانی تهءَ جژن گرگءَ ثواب هم هست. البت یک عیدے هپتگی هم دارېں که آئی جمعهءِ رۏچ اِنت. لذا ما اهلِ‌سنّت نوروزءَ په عیدءِ عنوان ندارېں ءُ همےڈَول سېزده په درءَ هم شرعی‌اېں حکمے نېست. لذا گِهتر اِش اِنت که ماں غیر چه اے رۏچاں ، گۏں اسلامی شئونءِ رعایت ءَ ءُ په هما گۏنگے که گۏں اهل سنّتءُ دۏد ءُ ربیتءَ مخالفتے مبیت ، په تفریح بروېں ءُ  چه الٰهی طبیعتءَ لذّت ببرېں.

سنت آنلاین