بلوچانی3000کیلومتری اعتراضی کاروان 106روچءَ رند، اسلام آبادءَ سربوت

په سنی آنلاینءِ حالکاریءَ نقل چه پارسی العربیهءَ، بلوچانی اعتراضی روانک که په وتی گاریں سیاد و وارثانی درگیجگءَ، چه کوئٹهءَ بنگیج بوتگ أت، 28 فوریه 2014ءَ اسلام آبادءَ سربوت  و شنبهءِ روچ (01-03-2014)ءَ ماں اسلام آبادءِ باشگاه مطبوعاتءَ، حالکارانی جستان إش جواب دات.

آیان گوش أنت که پاکستانءِ امنیتی واکاں هزاراں جهدکاریں بلوچ گار و بیگواه کتگ. بلوچانی کشگءِ اتهام رند چه جمعی قبرانی درکپگ ماں خضدارءَ گیشتر ثابت بوت.
بلوچانی اعتراضی کاروان گوں ماما قدیرءِ سروکیءَ رند چه 3000کیلومترءِ گوازینگءَ اسلام آبادءَ سربوتگ و انگتءَ وتی لوٹ و واهگانی رندگیریءَ کنگاأنت.
إے بلوچان وتی اعتراضی روانک، 27 اکتبر 2013ءَ چه کوئٹهءَ دیم په کراچیءَ بنگیج کت و رندءَ اسلام آبادءِ نیمگءَ رهادگ بوت أنت که هنو په وشی 100معترضیں بلوچ، اسلام آبادءَ سربوتگ. و آیانءَ وتی گار و بیگواهیں سیادانی عکس گون أنت و چه پاکستانءِ دولتءَ لوٹ أنت که کسانے که مئی سیاد و وارثانی گاربوگءِ سبب بوتگ أنت بایدإنت دزگیرکنگ ببنت و مئی حق چه آیان گرگ ببیت.
ماما قدیر بلوچءَ که 70سالگیں پیرمردے و إے کاروانءِ سروک إنت گوشتگی:  گیش چه 18000جهدکاریں بلوچ پاکستانءِ دولتءَ گپتگ و بازینے کشتگی و ماں بلوچستانءِ گیاباناں دوری داتگ.
بلوچانی کاروان ماں راهءِ دراجیءَ چه بازیں نیمگےءَ تهدید و پاترپ دیگ بوت بلئے کاروانءِ بهرزوروکان وتی همت دور ندات و کاروان إش په منزلءَ سرکت. همے پیمءَ کاروان ماں هر میتگےءَ چه مردمانی نیمگءَ وشاتک کنگ بوت و وهدے که کاروان اسلام آبادءَ رس إت بازینے آئیءَ وشاتک کت و کاروانءِ مردمانی سرا گل و پل إش چنڈإت.
بازیں پاکستانی رسانکےءَ ماما قدیر و آئیءِ همراهانی روانک په گاندیءِ روانک تشبیه دات و ماما قدیرإش “بلوچستانءِ گاندی” نامینتگ.
یک 10سالگیں گونڈوإے که آئیءِ پت دزگیرکنگ بوتگ و بازیں جنینے گوں کاروانءَ هورأنت.