مولانا عبدالحميد: صحابه همايان أنت كه بهشتءِ بشارت ديگ بوت أنت

شيخ الاسلام مولانا عبدالحميدءَ گوں صحابهءِ صفاتءِ بيان كنگءَ آياني “نيكيں انساں” زانت كه بهشتءِ ‌بشارت، چه اللهءِ نيمگءَ ديگ بوتگ أنت.

زاهدانءِ اهلسنتءِ جمعهءِ‌پيشنمازءَ، جمعهءِ(11بهمن1392 / 31 جنوری 2014)ءِ گپاں گوں إے آيهءِ وانگءَ «يَا أَيُّهَا الَّذِينَ آمَنُواْ اتَّقُواْ اللّهَ وَكُونُواْ مَعَ الصَّادِقِينَ »[توبه: 119] بنگيج و شروع كت أنت و پرمائينتي: صحابه – رضي الله عنهم-  پيغمبرءِ يار و همراه و اهل بيت أنت. صحابه واهل بيت همايان أنت كه اسلامي امتءَ نتوانتگ كه آياني حقءَ ادا بكنت، پچے كه آياں هنچيں زحمت كش إتگ كه هچ كس آياني وڑءَ قرباني دات نكنت. پيسر چه هجرتءَ چينچو مشقت برداشت إش كت؟ لهتے چاياں دو هجرت كت چوشكه حضرت عثمان –  رضي الله عنه – كه گوں يك گروهے چه صحابياں اولي رندءَ په حبشه ودومي رندءَ په مدينهءَ هجرت إش كت. همے واستا إے اصحاب په «ذوالهجرتين» معروف أنت.
مولانا عبدالحميدءَ پرمائينت: هجرت كنگ و وتي ملك و جاگاه و كعبهءَ يله ديگ، آسانيں كارے نه أت. اگاں تاريخءَ‌ بچارإيں گندإيں كه صحابه – رضي الله عنهم-  ماں چونيں حال و شرايطےءَ چه پيغمبر – صلي الله علي وسلم- ءَ ديمپاني و دفاع إش كت.
زاهدانءِ اهلسنتءِ‌ جمعهءِ پيشنمازءَ گوں إے مطلبءِ پرمائينگءَ كه « صحابياني مقصد چه إے سكياني برداشت كنگءَ بس اللهءِ‌ رضايت أت » پرمائينتي: صحابه ماں اخلاصءَ هں بے مٹ و بے درورإتنت. اوليا و صالحاں هچ وڑءَ نتوان أنت كه ماں اخلاصءَ په صحابياني مقامءَ برس أنت. آياني هدف و واهگ بس اللهءِ ‌رضايت أت. وهدے كه حضرت ابوبكر صديق-  رضي الله عنه – ماں غارءِ ثورءَ، گوں رسول الله و په آئيءِ خاطرءَ وتي خطر و مشكلاني آماچ كتگ أت، نزانتي كه يك روچے اسلامي حكومتے جوڑبيت و آئي رند چه پيغمبرءَ مسلماناني خليفه بيت. وهدے كه حضرت علي-  رضي الله عنه –  ماں هجرتءِ شپءَ پيغمبرءِ جاهءَ وپت، نزانتي كه رندءَ پيغمبرءِ‌ زامات و مسلماناني خليفه بيت. وهدے كه حضرت عثمان-  رضي الله عنه – ءَ هجرت كت نزانتي كه يك روچے مسلمانانءَ حكومتے بيت و آئي رند چه حضرت عمر-  رضي الله عنه – ءَ مسلماناني خليفه بيت. روچے كه 313نفر، قريشءِ لشكرءِ‌ديما اوْشتات أنت نزانت إش كه كافراني لشكر پروش وارت و هپتاد نفر چه آياں اسير بيت و بازينے كشگ بيت. بے شك إے بزرگاں چه آيوكيں احوالءَ سهيگ نه إتنت بلئے بس په اللهءِ رضاءَ كارإش كت.
 زاهدانءِ اهلسنتءِ جمعهءِ پيشنمازءَ ديمءَ چيزے چه حضرت عثمانءِ فضايلي بيان كت و پرمائينتي: حضرت عثمان – رضي الله عنه – چنت برءَ بهشتءِ بشارت ديگ بوت. اگرچه خداءَ سرجميں اصحاب، بهشتءِ بشارت داتگ أنت بلئے پيغمبر- صلي الله علي وسلم- ءَ چنت رندءَ حضرتءِ عثماني نام گپتگ و بهشتءِ بشارتي داتگ. يك رندے وهدے كه حضرت عثمانءَ ماں “جيش العسره”ءَ مسلماناني 300هشتر دات، مهترءَ بهشتءِ بشارت دات.
 حضرت عثمانءَ يك چاتے كه وشيں آپي هست أت گپتي وپه مسلماناني وقف كت كه چه پيغمبرءِ زبانءَ بهشتءِ بشارت آئيءَ رس إت. همے پيمءَ مهترءَ 10صحابيءِ‌نام گپت وآياني بهشتءِ بشارت دات كه حضرت عثمان گوں آيان هورأت. إے انساناں نيكيں انسان إتنت كه ما نتوانيں وتي واجه و رهشون و سروكاں په آياں قياس بكن إيں و گوں آياں يك بكن إيں.
دارالعلوم زاهدانءِ مديرءَ ديمءَ پرمائينت: مسلماناني گرپتاري و مشكلاني سبب إشنت كه چه صحابه واهل بيتءِ راهءَ دور بوتگ أنت. آياني نامءَ په وشي گرأنت بلئے آياني راهءَ نروأنت. نگبهتيءِ راه بس إشنت كه آياني وڑءَ قرآن و سنتءِ سرا عمل بكن إيں. هماوڑءَ كه آياں يكادگرءَ كمك كت و گوں براتيءَ زندإش گوازينت ما هں وتي براتي وتپاكيءَ حفظ بكن إيں.
مولانا عبدالحميدءَ ماں وتي گپاني آخرءَ گوں اشاره په دهه فجرءِ آيگءَ پرمائينتي: ماں إے روچاں ايرانءِ راج په وتي پيروزي و سوبيں بوگءَ نزيك بوگاإنت. اسلامي انقلاب اولي انقلاب أت كه مسلماناں گوازينت. جهانءِ پهكيں واك و قدرتاں كه چه شاهءَ حمايت إش كت حيران بوت أنت كه چتو يك ملت وراجے گوں خاليگيں دستاں، يك زوراك و مزن واكيں حكومتےءِ‌ ديمءَ پيروزبوت. إشي، اسلامي آگاهيءِ بنگيج ماں اسلامي ملكان أت، بلئے مروچي زوراك لوٹيت كه مسلماناني انقلابءَ چه بين ببارت.