عمرہ اور حج کرنے والوں کے لیے مستقل جداگانہ نظام

سعودی نائب وزیر حج وعمرہ ڈاکٹرعبدالفتاح مشاط نے کہا ہے کہ عمرہ اور حج کرنے والوں کے لیے مستقل جداگانہ نظام جلد جاری کیا جائے گا۔
تفصیلات کے مطابق سعودی نائب وزیر حج وعمرہ ڈاکٹرعبدالفتاح مشاط نے اپنے ایک بیان میں کہا کہ حج درخواستوں کی جانچ پڑتال میں کوئی گڑبڑ نہیں ہوئی۔ سارا کام مکمل مشینی نظام کے ذریعے انجام دیا گیا ہے۔
سعودی نائب وزیر حج وعمرہ نے کہا کہ عمرہ زائرین کی تعداد جتنی تھی اتنی ہی ہے۔ اس میں کوئی کمی بیشی نہیں کی گئی۔حجاج اور معتمرین کا جداگانہ نظام جلد جاری ہوگا۔
ڈاکٹر عبدالفتاح مشاط نے یہ بھی کہا کہ سیکیورٹی اور انتظامی ضوابط جاری کیے جائیں گے تاکہ عمرہ زائرین اور حج زائرین کے درمیان کسی قسم کا کوئی مسئلہ نہ پیدا ہو۔
سعودی نائب وزیر حج وعمرہ کا کہنا تھا کہ حج درخواستوں کی جانچ پڑتال کا کام اور پیکیج کے انتخاب کا عمل صرف الیکٹرانک سسٹم کے ذریعے ہوا ہے۔ اس میں کسی طرح کی کوئی انسانی مداخلت نہیں ہوئی۔
ڈاکٹر عبدالفتاح مشاط کا یہ بھی کہنا تھا کہ حج موسم میں نافذ کی جانے والی تمام پابندیاں ریڈ نشان ہیں- ان کی خلاف ورزی نہیں کی جاسکتی۔
سعودی نائب وزیر حج وعمرہ ڈاکٹرعبدالفتاح مشاط کا مزید کہنا تھا کہ حاجیوں کے خیموں میں سماجی فاصلے کا اصول مکمل طور پر نافذ کیا جائے گا۔