سعودی عرب اس سال بھی ’’خصوصی حالات‘‘ میں حج کا انتظام کرے گا

سعودی عرب اس سال بھی کرونا وائرس کی وَبا کو پھیلنے سے روکنے کے لیے ’’خصوصی حالات‘‘ میں حج کا انتظام کرے گا۔
سعودی عرب کی وزارتِ حج وعمرہ کے ترجمان نے اتوار کو ایک نیوزکانفرنس میں کہا ہے کہ ’’مملکت میں صحت حکام صورت حال کا مسلسل جائزہ لے رہے ہیں اور تمام لوگوں کے تحفظ کو یقینی بنانے کے لیے ضروری اقدامات کررہے ہیں۔‘‘
ترجمان نے مزید بتایا ہے کہ اس سال حج کے عملی منصوبہ کی مزید تفصیل کا بعد میں کسی وقت اعلان کیا جائے گا۔
واضح رہے کہ سعودی حکومت نے گذشتہ سال بھی کرونا وائرس کی وبا کے پیش نظر صرف مملکت میں مقیم محدود تعداد میں عازمین کو فریضہ حج ادا کرنے کی اجازت دی تھی۔