مولانا عبدالحمید ڈاکٹر ایاز نیازی کی شہادت پر اظہارِ مذمت

زاہدان (سنی آن لائن) اہل سنت ایران کے ممتاز عالم دین مولانا عبدالحمید نے معروف افغان عالم دین ڈاکٹر محمد ایاز نیازی کی شہادت پر افسوس کا اظہار کرتے ہوئے کابل کی وزیر اکبرخان جامع مسجد میں پیش آنے والے دہشتگردانہ واقعے کی شدید مذمت کی ۔

خطیب اہل سنت زاہدان کی آفیشل ویب سائٹ نے ان کا ایک بیان شائع کرتے ہوئے رپورٹ دی، مولانا عبدالحمید نے اپنے بیان میں کہا ہے: جامع مسجد وزیر محمد اکبر خان کابل میں دہشتگردی کے واقعے کے نتیجے میں مولوی ڈاکٹر ایاز نیازی شہید ہوئے جو میرے لیے گہرے رنج و غم اور افسوس کا باعث بنا ۔

بے گناہ افراد خاص کر اہل علم کو ٹارگٹ کلنگ کا نشانہ بنانا جو معاشرے کی اصلاح کرتے ہیں اور دینی علوم و معارف پھیلانے میں مصروف ہیں، ایک مذموم اور ناقابل قبول حرکت ہے جس کی شدید مذمت کرتے ہیں ۔

رکن رابطہ عالم اسلامی نے توقع ظاہر کی ہے کہ افغان حکام اس المناک حادثے کے پیچھے کارفرما افراد کو عدالت کے سپرد کریں گے ۔

مولانا عبدالحمید نے اپنے بیان کے آخر میں ڈاکٹر نیازی شہید کے اہل خانہ و متعلقین اور تمام افغان علمی حلقوں سے تعزیت کا اظہار کیا ہے ۔

یاد رہے ڈاکٹر محمد ایاز نیازی کابل کی ایک معروف مسجد کے امام و خطیب اور کابل یونیورسٹی کے استاذ تھے جنہیں بم دھماکے سے نشانہ بنایا گیا ۔ مرحوم پیشاور کے دینی مدارس کے فاضل اور الازہر یونیورسٹی مصر سے ڈاکٹریٹ حاصل کرنے کے بعد افغانستان میں دینی خدمات میں مصروف ہوئے تھے ۔ افغان معاشرے میں خاص کر نئی نسل میں انہیں کافی پذیرائی ملی ہے ۔