غزہ: ہفتہ وار مظاہرے، اسرائیلی فائرنگ سے فلسطینی بچہ شہید 41 زخمی

فلسطین کے علاقے غزہ کی پٹی کی مشرقی سرحد پرکل جمعہ کے روز ہونے والے ہفتہ وار احتجاجی مظاہروں کے دوران اسرائیلی فوج کی نہتے مظاہرین پر شیلنگ اور اندھا دھند فائرنگ سے ایک 14 سالہ بچہ شہید اور 41 فلسطینی زخمی ہوگئے۔
مرکز اطلاعات فلسطین کے مطابق غزہ کی پٹی پر اسرائیلی پابندیوں کے خلاف اور حق واپسی کی حمایت میں نکالی گئی ریلی پر اسرائیلی فوج نے فائرنگ کی جس کے نتیجے میں 14 سالہ بچہ یوسف سعید الدایہ شہید اور 41 فلسطینی زخمی ہوگئے۔ شہید ہونے والے فلسطینی بچے کا تعلق مشرقی غزہ کی زیتون کالونی سے بتایا جاتا ہے۔
فلسطینی محکمہ صحت کے مطابق جمعہ کے روز نماز جمعہ کے بعد غزہ میں نکالی جانے والی ریلی پر فائرنگ سے زخمی ہونے والے فلسطینیوں کو اسپتال منتقل کر دیا گیا ہے۔
وزارت صحت کا کہنا ہے کہ اسرائیلی فوج نےغزہ میں مظاہرین کو منتشر کرنے کے لیے ان پر زہریلی آنسوگیس کی شیلنگ کی جس کے نتیجے میں سیکڑوں شہری دم گھٹنے سے بے ہوش ہوگئے۔
خیال رہے کہ غزہ کی پٹی میں فلسطینی 30 مارچ 2018ء سے ہفتہ وار احتجاجی مظاہرے کر رہے ہیں۔ اسرائیلی فوج کی طرف سے فائرنگ اور طاقت کے استعمال سے اب تک 278 فلسطینی شہید اور 27 ہزار سے زاید زخمی ہوگئے ہیں۔