القدس نہ بچا سکے تو مکہ ومدینہ کا تحفظ بھی نہ کرسکیں گے:ایردوآن

ترکی کے صدر رجب طیب ایردوآن نے کہا ہے کہ بیت المقدس کو فلسطینیوں اور عالم اسلام کےہاتھ سے نکل جانا انتہائی خطرناک ہے۔ اگر مسلم امہ القدس کو بہ بچا سکی تو مکہ ومدینہ اور خانہ کعبہ کا تحفظ و دفاع بھی مشکل ہوجائے گا۔ انہوں نے کہا کہ امریکی صدر ڈونلڈ ٹرمپ نے بیت المقدس کو اسرائیلی ریاست کا دارالحکومت تسلیم کرکے مشرق وسطیٰ میں تباہ پھیلانے والا بم گرا دیا ہے۔

مرکزاطلاعات فلسطین کے مطابق استنبول میں ایک تقریب سے خطاب کرتے ہوئے صدر ایردوآن نے کہا کہ القدس کا دفاع پوری مسلم امہ کا دفاع ہے۔ اگر ہم القدس کا تحفظ نہ کرسکے تو تمام عالم اسلام کے دارالحکومت خطرے میں رہیں گے۔ پھر ہم مکہ اور مدینہ اور بیت اللہ کا دفاع بھی نہ کرسکیں گے۔ اگر بیت المقدس ہاتھ سے گیا تو مسلمان قبلہ اول سے محروم ہوجائیں گے اور مکہ ہاتھ سے نکلا تو خانہ کعبہ سے ہاتھ سے چلا جائے گا۔

انہوں نے کہا کہ امریکا کی طرف سے بیت المقدس کو اسرائیل کا دارالحکومت قرار دینا کوئی معمولی بات نہیں۔ امریکی اعلان القدس کے ذریعے مشرق وسطیٰ اور پورے عالم اسلام کو نشانہ بنایا گیا ہے۔ القدس کے بارے میں امریکی صدر کا اعلان عالم اسلام کے لیے ’ٹیس کیس‘ ہے۔ اگر عالم اسلام نے اب بھی بیداری اور ذمہ داری کا مظاہرہ نہ کیا تو کل کو ہم مکہ اور مدینہ جیسے سواد اعظم سے بھی محروم کیے جاسکتے ہیں۔

ترک صدر نے کہا کہ ٹرمپ کے ’اعلان القدس‘ کے بعد ترکی بیت المقدس کے دفاع اور تحفظ کے لیے موثر اقدامات کرے گا۔

ان کاکہنا تھا کہ بیت المقدس کے بارے میں امریکی فیصلہ صہیونی طاقتوں کا عالم اسلام کی عزت و وقار پرحملہ ہے۔ اپنی عزت کا دفاع پورے عالم اسلام پر فرض ہے۔ القدس ہمارے پاس ہمارے آباؤ اجداد کی امانت ہے اور ہمیں تا قیامت اس کی حفاظت کرنا ہے۔

قبل ازیں ترک صدر نے کہا کہ ہم امریکی اقدام کے خلاف سلامتی کونسل میں جائیں گے۔ اگر امریکا نے ویٹو کے ذریعے ہمیں روکا تو جنرل اسمبلی کےذریعے امریکا کے غیرقانونی اقدام کو منسوخ کرانے کی کوششیں کریں گے۔