برطانیہ میں مسلم خواتین کے ایک گروپ نے اسلام مخالف مہم پر بہترین انداز سے ردعمل کا اظہار کیا ہے۔
واضح رہے کہ جنوب مشرقی لندن میں رواں ہفتے 12 دسمبر کو فارسٹ ہل ٹرین اسٹیشن پر ایک مسلمان شخص کو چاقو کے وار کرکے زخمی کردیا گیا اور حملہ آور اس دوران یہ نعرے لگاتا رہا ‘میں مسلمانوں کو قتل کرنا چاہتا ہوں’۔
حملے میں زخمی شخص ہسپتال میں زیرعلاج ہے جہاں اس کی حالت تشویش ناک بتائی جارہی ہے۔
ان حالات میں ایک مسلم خاتون ایشا عائشہ نے سماجی رابطے کی ویب سائٹ ٹوئٹر پر ‘فلاور مہم’ کا اعلان کیا۔
انہوں نے اپنی ٹوئیٹ میں لکھا ‘جنوب مشرقی لندن میں کچھ دوستوں پر چاقو سے حملے کے ردعمل کے طور پر میں فارسٹ ہل اسٹیشن میں پھول تقسیم کروں گی’۔
بدھ 14 دسمبر کی صبح فارسٹ ہل اسٹیشن کے باہر خواتین کا یہ گروپ اکھٹا ہوا اور وہاں سے گزرنے والوں کو گلاب کے پھول دینا شروع کردیئے۔
جس کے بعد لوگوں نے ان پھولوں کی تصاویر ٹوئٹر پر شیئر کرنا شروع کردیں۔
ڈان نیوز