اسرائیلی عقوبت خانوں میں14 کم عمر بچیوں سمیت خواتین کی تعداد 64ہوگئی

فلسطین میں اسیران کے حقوق کے لیے کام کرنے والی تنظیم نے اپنی رپورٹ میں بتایا ہے کہ اسرائیلی عقوبت خانوں میں پابند سلاسل فلسطینی خواتین کی تعداد 64 ہوگئی ہے جن میں 14 کم عمر بچیاں بھی شامل ہیں۔
فلسطینی مرکزاطلاعات کے مطابق انسانی حقوق کی تنظیم کلب برائے اسیران کی جانب سے جاری کردہ ایک بیان میں بتایا گیاہے کہ رواں ماہ مارچ کے دوران اسرائیلی فوج کی کارروائیوں میں مزید آٹھ خواتین کو حراست میں لیا گیا جن میں دو کم عمربچیاں شامل ہیں۔
میڈیا رپورٹس کے مطابقگزشتہ روز اسرائیلی فوجیوں نے مغربی کنارے کے شمالی شہر جنین کے جنوب مغربی قصبے یعبد میں تلاشی کے دوران ایک 17 سالہ فلسطینی لڑکی شیما عطاطرہ کو حراست میں لے لیا۔ قبل ازیں صہیونی فوج نے نابلس سے 25 سالہ ایناس سعید ابو ھلال اور مشرقی بیت المقدس کے ابو دیس قصبے سے چاقو حملے کی منصوبہ بندی کے الزام میں 30 سالہ وفا محمد ابو ھلال کو حراست میں لینے کے بعد نامعلوم مقام پر منتقل کردیا۔خیال رہے کہ فلسطین میں پچھلے سال اکتوبرمیں شروع ہونے والی تحریک انتفاضہ القدس کے دوران اسے ناکام بنانے کے لیے بڑی تعداد میں فلسطینیوں کی گرفتاری شروع ہوئی تھی ۔ اس دوران بڑی تعداد میں فلسطینی خواتین کو بھی حراست میں لے کرانہیں تشدد کا نشانہ بنایا گیا۔

بصیرت آن لائن