فلسطینی “ماہ صیام” کے استقبال میں قومی یکجہتی کا مظاہرہ کریں:امام قبلہ اول

مسجد اقصیٰ کے امام وخطیب اور ممتازفلسطینی عالم دین الشیخ محمد سلیم نے کہا ہے کہ رمضان المبارک کا بابرکت مہینا فلسطینیوں کے درمیان پائے جانے والے سیاسی، عائلی، سماجی اورطبقاتی فرق کو مٹانے اور قومی یکجہتی کا مظاہرہ کرنے کا بہترین ذریعہ ثابت ہوسکتا ہے۔
مرکزاطلاعات فلسطین کے مطابق الشیخ محمد سلیم نے نماز جمعہ سے قبل مسجد اقصیٰ میں اجتماع سے خطاب کرتے ہوئے کہا کہ فلسطینی قوم کے مختلف طبقات کو ماہ صیام کے استقبال کے موقع پر قومی یکجہتی کا مظاہرہ کرتے ہوئے ہرقسم کے اختلافات کو ختم کرنا چاہیے اور صہیونی دشمن کے خلاف سیسہ پلائی دیوار بن کر کھڑے ہونے کا مظاہرہ کرنا چاہیے۔
فلسطینی عالم دین کا کہنا تھا کہ ماہ صیام مسلمانوں کو آپس میں جوڑنے کا ذریعہ ہے۔ فلسطینی قوم میں مختلف سیاسی نوعیت کے اختلافات کے خاتمے کے لیے ماہ صیام کے بابرکت ایام کو استعمال کرنا چاہیے اور ان ایام سے فائدہ اٹھانا چاہیے۔ صرف فلسطینیوں نے نہیں بلکہ پوری مسلم امہ میں رمضان المبارک کامہینا ملی یکجہتی کا ذریعہ بن سکتا ہے۔
انہوں نے کہا کہ عالم اسلام بالخصوص مسلمانان فلسطین کو جس خطرناک دشمن کا سامنا ہے اس کا مقابلہ کرنے کے لیے انہیں اپنی صفوں میں لامحالہ اتحاد پیدا کرنا ہوگا۔ مسلمانوں کے درمیان فاصلے اور بے اتفاقی دشمن کی سازشیں ہیں۔ مسلمانوں کو اپنی صفوں میں ان سازشوں کے خاتمے کے لیے خود ہی اقدامات کرنا ہوں گے۔

مرکزاطلاعات فلسطین