راولپنڈی: اہلسنت والجماعت کے سیکرٹری اطلاعات قتل

تھانہ شہزاد ٹاؤن کے علاقے میں نامعلوم افراد نے فائرنگ کر کے اہلسنت والجماعت کے سیکرٹری اطلاعات راولپنڈی سہیل معاویہ کو قتل کر دیا جبکہ واقعہ میں 3 افراد شدید زخمی ہوگئے جنہیں تشویشناک حالت میں پمز ہسپتال منتقل کر دیا گیا ہے جہاں زخموں کی تاب نہ لاتے ہوئے ایک زخمی عمران دم توڑگیا۔

معلوم ہوا ہے کہ پیر کی شب ساڑھے گیارہ بجے کے قریب تھانہ شہزاد ٹاؤن پولیس کے علاقہ ضیاء مسجد سروس روڈ پر نامعلوم ملزمان نے اہلسنت والجماعت کے مقامی رہنما و سیکرٹری اطلاعات راولپنڈی ریجن سہیل معاویہ پر اندھا دھند فائرنگ کی جس کے نتیجے میں سہیل معاویہ زخموں کی تاب نہ لاتے ہوئے موقع پر ہی دم توڑ گئے جبکہ ان کے دو دیگر ساتھی امان اللہ، عمران اور ناصر اس واقعہ میں شدید زخمی ہوئے جنہیں پولیس نے فوری طور پر پمز ہسپتال منتقل کر دیا ہے، جبکہ ایک زخمی عمران کو فوری طور پر بے نظیر ہسپتال منتقل کیا گیا جہاں وہ زخموں کی تاب نہ لاتے ہوئے جاں بحق ہوگیا۔ ہسپتال ذرائع کے مطابق زخمی افراد کی حالت تشویشناک بتائی جا رہی ہے۔ شہزاد ٹاؤن پولیس کے مطابق ملزمان موقع سے فرارہوگئے ہیں۔ تاہم علاقہ کی ناکہ بندی کر کے ملزمان کی تلاش جاری ہے ۔

اردو ٹائمز