بیت المقدس: اسرائیلی فوج کے ہاتھوں حماس رہ نما کی اہلیہ گرفتار

فلسطین میں انسانی حقوق کی تنظیموں نے اطلاع دی ہے کہ اسرائیلی فوج نے مقبوضہ بیت المقدس میں تلاشی کی کارروائی میں سابق اسیر اور مزاحمتی لیڈر ایمن ابوعید کی اہلیہ 34 سالہ نادیہ لطفی ابوعید کو حرست میں لینے کے بعد نامعلوم مقام پر منتقل کر دیا ہے۔

فلسطین میں اسیران کے حقوق کے لیے سرگرم تنظیم” اسیران اسٹڈی سینٹر” کے ڈائریکٹر فواد خفش نے بتایا کہ صہیونی فوجی بیت المقدس کے قدیم شہر میں شاہراہ عام پر ناکہ لگا کر تلاشی کی کارروائیوں میں مصروف تھے۔ اس دوران نادیہ اپنی ننھی بچی کو اسپتال لے جانے کے لیے وہاں سے گذری تو فوجیوں نے اس کی گاڑی روک لی۔ نادیہ لطفی کو بچی سمیت گاڑی سے اتار کر ایک فوجی جیپ میں ڈال دیا گیا اور اس کی کار بھی قبضے میں لے لی۔

خفش نے بتایا کہ نادیہ لطفی اسلامی تحریک مزاحمت[حماس] کے رہ نما اور سابق اسیر ایمن ابو عید کی اہلیہ ہیں۔ ایمن صہیونی جیل میں پندرہ سال قید رہ چکے ہیں۔ ان کے سات بچے بچیاں ہیں، جن میں سب سے چھوٹے کی عمر ایک سال ہے۔

مرکز اطلاعات فلسطین