مصر: حملوں میں 9 سیکورٹی اہلکار ہلاک

مصر کے مختلف حصوں میں ہونے والے حملوں میں سکیورٹی فورسز کو نشانہ بنایا گیا جس کے نتیجے میں نو فوجی اور پولیس اہلکار ہلاک ہو گئے۔

سیکورٹی حکام نے بتایا ہے کہ شمال مشرقی مصر کے اسماعیلیہ علاقے میں فائرنگ کے واقعے میں ایک فوجی افسر سمیت چھ اہلکار ہلاک ہوگئے۔ یہ تمام فوجی ایک چیک پوائنٹ پر کار میں بیٹھے تھے جب ان پر کچھ مسلح افراد نے حملہ کر دیا۔ جنوبی سینا کے علاقے الطور میں ایک کار بم حملے میں تین پولیس اہلکار ہلاک جبکہ چالیس افراد زخمی ہو گئے۔ اس حملے میں سکیورٹی فورسز کے زیرِ استعمال ایک عمارت کو شدید نقصان پہنچا۔ قاہرہ کے بیرونی حصے میں ایک سیٹلائٹ سٹیشن پر راکٹوں سے حملہ کیا گیا جس کے نتیجے میں ایک سیٹلائٹ ڈش کو نقصان پہنچا۔ اتوار کو برطرف صدر محمد مرسی کے حامیوں اور سکیورٹی فورسز کے درمیان ہونے والی تازہ ترین جھڑپوں میں درجنوں افراد ہلاک اور کئی سو سے زیادہ زخمی ہوئے ہیں۔ اطلاعات کے مطابق قاہرہ میں 26 افراد ہلاک ہوئے ہیں جبکہ اخوان المسلمین کے دو سو سے زیادہ افراد کو گرفتار کیا گیا۔

اردو ٹائمز