ایران: سنی مسلمانوں کے اسرائیل کیخلاف مظاہرہ

زاہدان(سنی آن لائن)سینکڑوں سنی مسلمانوں نے جمعہ سولہ نومبر میں صہیونی ریاست اسرائیل کے غزہ پر حالیہ حملوں کے خلاف مظاہرہ کرکے فلسطینی مسلمانوں سے یکجہتی کا اظہارکیا۔

’سنی آن لائن‘ کے نامہ نگار کے مطابق زاہدان شہر کے دیندار سنی مسلمانوں نے جامع مسجدمکی میں نمازجمعہ کی ادائیگی کے بعد ’خیام‘ روڈ پر اسرائیل کی حالیہ قتل وغارتگری کی پرزور الفاظ میں مذمت کی۔ خطیب اہل سنت شیخ الاسلام مولانا عبدالحمید کی تاکید وترغیب کے بعد نمازیوں نے خیام روڈ پر اپنا احتجاج ریکارڈ کرتے ہوئے امریکا مردہ باد، اسرائیل مردہ باد کے فلک شگاف نعرے لگائے۔

ایران کے مشرقی صوبہ سیستان بلوچستان کے مرکز زاہدان میں اسرائیل مخالف مظاہرے کی قیادت سنی علمائے کرام نے کی۔

سنی مظاہرین نے پوری دنیا کے مسلمانوں سے اتحاد وبھائی چارے کی اپیل کرتے ہوئے اسرائیل سے اپنی نفرت کا اظہارکیا۔ شہدائے فلسطین کو خراج عقیدت پیش کرتے ہوئے انہوں نے فلسطینی عوام سے یکجہتی کا اعلان کیا۔