یمن:عدن میں خودکش ٹرک بم دھماکا،9 فوجی ہلاک

صنعا(العربیہ ڈاٹ نیٹ،ایجنسیاں) یمن کے جنوبی شہر عدن میں ایک فوجی کیمپ کے مرکزی گیٹ پر خودکش ٹرک بم دھماکے کے نتیجے میں نو فوجی ہلاک اور بیس سے زیادہ زخمی ہوگئے ہیں۔ اطلاعات کے مطابق خودکش حملہ آور نے اپنی بارود سے بھری گاڑی کو کیمپ کے گیٹ کے نزدیک دھماکے سے اڑادیا۔حکام کا کہنا ہے کہ اس وقت فوجی گاڑیوں کا ایک قافلہ ہمسایہ صوبے ابین میں روانہ ہونے کی تیاری کررہا تھا جہاں فوج اور القاعدہ کے جنگجوٶں کے درمیان گذشتہ دوماہ سے جھڑپیں جاری ہیں۔
حکام نے بتایا ہے کہ مرنے والوں میں دو سنئیر فوجی افسر ۔۔۔۔۔ ایک میجر اور ایک لیفٹیننٹ کرنل ۔۔۔۔ بھی شامل ہیں اور اکیس فوجی زخمی ہوئے ہیں۔عدن میں گذشتہ دو ماہ میں یمنی فوج پر یہ دوسرا بم حملہ ہے۔یمنی حکام اس سے پہلے متعدد مرتبہ متنبہ کر چکے ہیں کہ جزیرہ نما عرب میں القاعدہ سے وابستہ جنگجو عدن میں فوج کو نشانہ بنا سکتے ہیں۔
القاعدہ کے جنگجوٶں نے مئی سے یمن کے جنوبی صوبے ابین کے دوشہروں پر قبضہ کررکھا ہے اور وہاں ان کے اور سرکاری فوج کے درمیان وقفے وقفے سے لڑائی جاری ہے۔ یمن میں گذشتہ چھے ماہ سے صدر علی عبداللہ صالح کے خلاف عوامی احتجاجی مظاہرے جاری ہیں اور ان سے اقتدار چھوڑنے کا مطالبہ کیا جارہا ہے۔اس دوران القاعدہ کے جنگجوٶں کو ملک کے بدامنی کا شکار جنوبی علاقوں میں اپنے قدم جمانے کا موقع مل گیا ہے۔