بیروت(ایجنسیاں) لبنان کے صدر میشل سلیمان نے سعد حریری کی قیادت میں مستعفی حکومت سے اپیل کی ہے وہ نئی حکومت کی تشکیل تک امور مملکت انجام دے۔
ایوان صدر کے جنرل ڈائریکٹوریٹ سے جمعرات کے روز میڈیا کو جاری کردہ بیان میں کہا گیا ہے کہ کابیبنہ کے ایک تہائی وزراء کے استعفی اور حکومت کے مستعقفی ہونے سے متعلق دستوری دفعات کی روشنی میں صدر نے سعد حریری سے کہا ہے کہ وہ نئی حکومت کی تشکیل تک امور مملکت چلائیں۔
لبنان میں قومی اتفاق رائے کی اتحادی حکومت کی کابینہ تیس وزراء پر مشتمل تھی۔ بدھ کے روز گیارہ وزراء کے استعفے کے بعد اس اتحادی حکومت کا خاتمہ ہو گیا۔ دستور کے مطابق ایک تہائی وزراء کے استعفوں کی وجہ سے حکومت کو مستعفی تصور کیا جاتا ہے۔ یہ حکومت گذشتہ برس نومبر میں بنی تھی۔
ملکی قانون لبنانی صدر سے اس بات کا تفاضہ کرتا ہے کہ وہ نئی حکومت کی تشکیل کی خاطر ایوان میں کسی سنی شخصیت کو نئی حکومت بنانے کی دعوت دیں۔ سعد حریری اور حزب اللہ کے درمیان رفیق حریری قتل کیس کی تحقیقات کے لئے بنائے گئے خصوصی ٹرابیونل کی وجہ سے دیرنیہ کشیدگی چلی آ رہی تھی۔
حالیہ چند دنوں میں ٹرابیونل کی کارروائی کے بعد چند ایسے اشارے ملے تھے کہ جن سے اس فورم کے متوقع فیصلے کے بارے میں قیاس آرائیاں شروع ہو گئی تھیں کہ شاید ٹرابیونل اپنے فیصلے میں حزب اللہ کے سینئر ارکان کو رفیق حریری قتل کیس میں ماخوذ کرنے جا رہا ہے۔