بھارتی شہر بنارس میں مندر کے باہر دھماکا‘ ایک شخص ہلاک

نئی دہلی (آن لائن) بھارتی ریاست اتر پردیش میں مندر کے باہر دھماکے کے نتیجے میں ایک شخص ہلاک اور 7غیر ملکیوں سمیت 40افراد زخمی ہوگئے۔

بھارتی ٹی وی کے مطابق بھارتی شہری بنارس کے نواحی علاقے شیتلا گھاٹ کے مندر میں ہندو اپنی عبادت میں مصروف تھے کہ اس دوران مندر کے باہر زور دار دھماکا ہوا جس سے مندر کی عمارت کے شیشے ٹوٹ گئے دھماکے سے ایک شخص ہلاک اور 40سے زائد زخمی ہوگئے ہیں زخمیوں میں غیر ملکی بھی شامل ہیں دھماکے کے بعد امدادی ٹیموں نے موقع پر پہنچ کر زخمیوں کو بنارس کے اسپتالوںمیں منتقل کردیا ہے اور بھارتی پولیس نے دھماکے کے بعد جائے وقوع کو سیل کرکے تحقیقات شروع کردی ہیں۔
دوسری جانب بھارتی وزیراعظم من موہن سنگھ نے بم دھماکے کی مذمت کرتے ہوئے کہا کہ یہ دھماکے بھارت کی دہشت گردی کی شیطانی قوتوں کے خلاف جنگ کو کمزور کرنے کی کوشش ہے جس میں وہ کامیاب نہیں ہوسکیںگے جبکہ بھارتی عسکریت پسند تنظیم انڈین مجاہدین نے انٹرنیٹ پر اپنی ایک ای میل میں دھماکے کی ذمہ داری قبول کرلی ہے۔