کراچی(جنگ نیوز) کراچی کے مختلف علاقوں میں گذشتہ دو روز کے دوران فائرنگ اور پرتشدد واقعات میں 37افراد لقمہ اجل بن چکے ہیں.
دوسری جانب وفاقی وزیر داخلہ رحمان ملک نے واقعات کا نوٹس لیتے ہوئے ڈی جی رینجرز سندھ کوامن و امان اور سیکورٹی کی صورتحال بہتر بنانے کی ہدایت کی ہے،جبکہ پولیس اور رینجرز نے ٹارگٹ کلنگ اور ہنگامہ آرائی کے شعبے میں میں 65سے زائد افراد کو بھی حراست میں لے لیا ہے۔
پولیس کے مطابق الصبح کورنگی ٹاؤن سے ایک شخص کی ہاتھ پاؤں بندھی لاش برآمد ہوئی،رات گئے پیش آنے والے فائرنگ کے واقعات میں صرف ایک گھنٹے کے دوران6 افراد جاں بحق ہو گئے۔
لانڈھی کے علاقے بابر مارکیٹ میں ہوٹل اور قالین کی دکان پر فائرنگ سے3 افراد جاں بحق ہوگئے۔جبکہ لانڈھی کے علاقے یوسف گوٹھ میں بھی ایک شخص کی لاش ملی،جسے فائرنگ کرکے ہلاک کیا گیا تھا۔
یونیورسٹی روڈ، ابولحسن اصفہانی روڈ پر مسکن چورنگی، کیماڑی اور قضبہ موڑ پر چار افراد جاں بحق ہوئے، اسی دوران11 زخمی افراد کو بھی طبی امداد فراہم کرنے کے لئے مختلف اسپتالوں میں لایا گیا۔دوسری جانب پولیس اور رینجرز نے امن وامان کی صورتحال کو بہتر بنانے کے لئے شہر میں اسنیپ چیکنگ اور گشت بڑھا دیا ہے۔ جبکہ صوبائی وزیر داخلہ سندھ ذوالفقار مرزا کی ہدایت پر چائے اور کھانے کے ہوٹلوں پر بھی پولیس اہلکاروں کے ساتھ سادہ کپڑوں میں اہلکار تعینات کیئے گئے ہیں۔
گذشتہ روز لیاری میں رینجرز کے چھاپوں کے بعد مشتعل افراد نے ٹائر جلا کر ٹریفک بلاک کردی تھی اور اپنا احتجاج ریکارڈ کروایا تھا،جس کے بعد رینجرز اہلکار علاقے سے واپس آگئے تھے،رات بھر شہر کے مختلف علاقوں میں پولیس اور رینجرز کی جانب سے چھاپہ مار کاروائیوں کا سلسلہ بھی جاری ہے۔