ڈرون حملے حکمرانوں کی مرضی سے ہو رہے ہیں،مولانا فضل الرحمان

پشاور(خبررساں ادارے) جمعیت علمائے اسلام کے سربراہ مولانا فضل الرحمان نے کہاہے کہ قبائلی علاقوں میں امریکی ڈرون حملے ہمارے حکمرانوں کی مرضی اور رضامندی سے ہو رہے ہیں ۔

ملاکنڈ کے علاقے سخاکوٹ میں میڈیا کے نمائندوں سے گفت گو کرتے ہوئے جے یو آئی(ف) کے سربراہ مولانا فضل الرحمان نے کہا ہے کہ ڈرون حملوں میں بے گناہ لوگوں کو نشانہ بنا کران پر دہشت گردی کا لیبل لگایا جاتا ہے ۔
مولانا فضل الرحمان نے کہا کہ الطاف حسین ملک میں انقلاب کی باتیں کررہے ہیں،جو قوم کے ساتھ مذاق ہے۔ انہوں نے کہا کہ لندن میں بیٹھ کر پاکستان سے جاگیردارانہ نظام کوختم نہیں کیا جا سکتا۔