کراچی(جنگ نیوز) ملک بھر کے مختلف مکاتب فکر کے علماء نے کہا ہے کہ سیلاب کی تباہ کاریوں سے کروڑوں افراد شدید متاثر ہوئے ہیں، رمضان المبارک میں ان مسلمان بھائیوں کے پاس سحر اور افطار کیلئے کچھ نہیں ، لہٰذا عمرہ پر جانے والے حضرات بہتر ہے کہ ان متاثرین کی مدد کریں، عمرے کی رقم متاثرین کو دینا افضل عمل ہے ، اسلام جان بچانے کو فوقیت دیتا ہے۔ عمرہ کے اخراجات سیلاب زدگان کی امداد کیلئے دینے سے اللہ راضی ہوگا۔
ان خیالات کا اظہار ملک بھر کے مختلف مکاتب فکر سے تعلق رکھنے والے علمائے کرام نے ”جنگ کے ملک گیرسروے“ میں کیا۔علمائے کرام میں مفتی محمد نعیم،مرزا یوسف،مولانا دستگیر افغانی،مفتی عبدالحمید ،حافظ علامہ زبیر احمد ظہیر ،حافظ عبدالوہاب روپڑی،مولانا محمد امجد خان،پروفیسر راغب نعیمی، مفتی ہدایت اللہ پسروری، علامہ خالد محمود ندیم،خورشید عباس گردیزی اور دیگر شامل ہیں۔
معروف عالم دین اور جامعہ بنوریہ کے مہتمم مفتی محمد نعیم نے کہا کہ اسلام خدمت کا مذہب ہے اس وقت لاکھوں انسانی جانیں خطرات کا شکار ہیں ان حالات میں اگر عمرہ کرنیوالا ان افراد کی مدد کر سکتا ہے تو بہتر ہے تاہم وہ عمرے کی رقم متاثرین کو دیدے یہ افضل عمل ہے ، اسلام انسانی جان بچانے کو فوقیت دیتا ہے۔ معروف عالم دین مرزا یوسف نے کہا کہ ان حالات میں عمرہ کیلئے جانیوالے حضرات اپنے مسلمان بھائیوں کی جانیں بچانے کیلئے قربانی دیں اللہ انہیں بہتر اجر عطا کرے گا ۔
جامعہ ضیاء العلوم کے مہتمم مولانا دستگیر افغانی نے کہا کہ مصیبت کی اس گھڑی میں افضل بات یہ ہوگی کہ عمرہ پر جانے کو آئندہ سال کیلئے موقف کرکے انسانی جانیں بچائی جائیں۔
جامعہ فاروقیہ اور جامعہ اشرف المدارس کے سابق رئیس افتاء اور جامعہ دارالہدیٰ کے مہتمم مفتی عبدالحمید نے کہا کہ نفلی عبادت پر پیسہ خرچ کرنے سے بہتر ہے کہ متاثرین سیلاب کی مدد کی جائے،رمضان المبارک کا مہینہ ہے لاکھوں افراد سحر اور افطار پانی سے کر رہے ہیں بیماریاں پھیل رہی ہیں، ہزاروں افراد کی زندگیاں خطرے میں ہیں لہٰذا انسانی جان بچانے کو فوقیت دی جائے۔
لاہور سے نمائندہ جنگ کے مطابق حافظ علامہ زبیر احمد ظہیر نے کہا ہے کہ ان حالات میں عمرہ کیلئے جانیوالے لوگ رقم سیلاب زدگان کی امداد کیلئے دے دیں تو یہ ایک بڑی عبادت اور نیکی ہوگی۔ حافظ عبدالوہاب روپڑی نے کہا کہ عازمین عمرہ اپنا عمرہ ملتوی کرکے اس کی رقم سیلاب زدگان کی امداد میں دیں تو یہ بھی ثواب ہے۔
مولانا محمد امجد خان نے کہا کہ موجودہ حالات میں عمرے پر جانے والے لوگ اللہ کی رضا اور غریبوں کی مدد کیلئے عمرہ پر خرچ ہونیوالی رقم سیلاب زدگان کی امداد میں دے سکتے ہیں۔
ملتان سے نمائندہ جنگ کے مطابق جامعہ نعیمیہ گڑھی شاہو لاہور کے مہتمم پروفیسر راغب نعیمی نے کہا کہ جو لوگ عمرے پر جارہے ہیں انہیں چاہئے کہ وہ اس رقم سے سیلاب زدگان کی مالی امداد کریں سیلاب زدگان کی مدد افضل عبادت کے زمرے میں شمار کی جائے گی۔
مفتی ہدایت اللہ پسروری نے کہا کہ عمرہ پھر بھی کیا جاسکتا ہے سیلاب زدگان کی مدد اس وقت ضروری ہے۔
مرکزی جمعیت اہلحدیث کے رہنما علامہ خالد محمود ندیم نے کہا کہ سیلاب زدگان کی مالی امداد کرنا عمرے کے ثواب سے بڑھ کر ہے۔
جمعیت علماء اسلام ضلع ملتان کے امیر سید خورشید عباس گردیزی نے کہا کہ سیلاب زدگان کی مدد سے زیادہ ثواب ملے گا۔