شیخالاسلام مولانا عبدالحمید ماں زاهدان ءِ نماز جمعه ءِ دیوان ءَ ( ۳۰ مرداد ۱۴۰۵/ ۲۱ اگست۲۰۲۶) گوں اشاره به امریکه ءِنوکێں مالزانشتی بندشاں، آئی مراد شه اے بندشاں ءَ ایران ءِ مالزانشت ءِ نزور کنگ ءُ ایران ءِ مرداں گۆں سکیانی آماچ کنگ زانت ءُ شه کارمستراں لۆٹ ات ماں اے سکێں جاور ءَ آوانی بنی کرد ءُ گامگێجاں مردمانی رۆزیگی مشکلانی رندگیری کنگ بیت.
🔹مردمانی رۆزیگی جاور سک نگێگ انت؛ بائد مچێں مڈیاں په مردماں هرچ بهانت
په سنیآنلاین ءِ سرهال ءَ مولانا عبدالحمید درشان کرت: ماں اے جاور ءَ که دشمنانی مراد همێش انت که جنگ ءُ بمگواریانی بدل ءَ گۆں بِیڑو ءُ مالزانشت ءِ ملش ءُ نزور کنگ ءُ مردمانی زندمان ءَ سکیانی دۆچار کن انت، کارمستراں بائد مردمانی معیشت ءُ زندمان ءِ پکر ءَ به انت.
واجه ءَ گێش کرت: ایران ءِ مردمانی رۆزیگی جاور سک نگێگ انت ءُ آوان وتی لوگمان ءِ هرچءُدرچانی دێم ءَ درمنتگ انت. مردمانی گراک ءُ وس ءُ واک سک کمتر بوتگ ءُ دکاناں گراگ نه دار انت. ماں اے جاور ءَ بائد کارمسترانی تیوگێں کۆشست مردمانی رۆزیگی مشکلانی رندگیری بیت ءُ مچێں مڈیاں بائد په مردماں هرچ به انت.
🔹کارمستراں شه ترندی ءُ مالی فساداں دێمداری کن انت
زاهدان ءِ آدێنگ ءِ امام ءَ په دێمداری شه مالی فساداں کڈن کرت ءُ گوشت ئی: بژن انت که ملک مالی فسادانی آماچ انت ءُ همے فساد بازێنے شه دگه فسادانی سوب انت. بائد انت گۆں فساد ءَ دێم په دێمی بیت. تاں وهدے که ترندیانی دێم گرگ مه بیت همے کمێں مڈی ئے هم که هست انت، مردمانی دست ءَ نه رس انت.
🔹نونێں هلوچگریانی رهوت گۆں نشه ئی مواداں رد انت؛ بےمیارێں مردماں هلوچ کنگ به انت
مولانا عبدالحمید ماں دگه بهرے شه وتی هبراں گوشت: یک کارمسترے گوشتگ که اے رۆچانی گێشترێں هلوچگری ءُ مردمانی آوارجنیانی سوب نشه ئی موادانی باپار انت. منی دیدانک ءَ اے گپ رد انت، بیتکنت که آئی گپاں گوست ءِ هلوچگریانی بابت ءَ راست بهانت، بلے اے رۆچاں گێشتری هلوچگریانی سوب باجلۆٹی انت. بیتکنت که باز کمێنے ءِ سوب نشه ئی موادانی باپار بیت.
واجه ءَ گێش کرت: مئے ترس اێش انت که چۆشێں گپاں سوب به انت کارمستراں هلوچگریاں نادلگۆش کن انت، چیا که پێسر ءَ چۆش گوشگ بوتگ که هلوچگریانی سوب نشه ئی موادانی باپار انت، بلے اێرنگ نه انت، پچےکه کاسب ءُ بازاری ءُ بےمیارێں مردماں هلوچ کنگ به انت.
🔹هلوچگری ءُ کۆشانی گێش بوگ ءِ سوب کانود ءِ اێر ندارگ انت
زاهدان ءِ آدێنگ ءِ امام ءَ گوشت: اے که اے رۆچاں دزی ءُ راهجنی ءُ هلوچگری ءُ ناحقێں کۆش باز بوتگ انت، پمێشا انت که کانود په جوانی اێردارگ نه بیت.
واجه ءَ کڈن کرت: اگه کانود په جوانی اێر دارگ بوتێن چاگرد ءِ امنیت گڈءُوڈ نه بوت. بلے وهدےکه کانود په جوانی اێر دارگ مه بیت، مۆکءُملام گرگ بیت ءُ دز ءُ هلوچگر ءُ کۆشکار په وتی رکێنگ ءَ مۆک دنت، یا پارتیبازی بیت یا کۆشکار ءُ هلوچگر په اسپےریش ءُ عالم ءِ میانجیگری ءَ امێتدار بیت، همےچیز ماں چاگرد ءَ مشکلانی سوب به انت.
🔹ناحقێں کۆش هچ نیمۆنے نه دار انت؛ عالم ءُ اسپےریشاں په چۆشێں کۆشاں میانجیگری مه کن انت
مولانا عبدالحمید گوشت: اگه کۆشے ءِ سوب دێمپانی شه ناموس ءَ یا جان ءُ مال ءَ بیت که مردمے گۆں سلاه ءَ دێم ءَ آتگ، بیت که په آئی راهے درگێج ات، بلے ناحقێں کۆش که بےهچ نیمونے مردماں کش ایت، هچ توجیلے نه دار ایت.
واجه ءَ گێش کرت: منی لۆٹ شه علما ءُ اسپےریش ءُ سجێں مردم ءُ ٹکاں همێش انت که په ناحقێں کۆشاں میانجیگری مه کن انت، آئی که مردمے را کشتگ بائد کشگ بیت. البت الله پاک ءَ سبکی ءُ آسانی آورتگ ءُ هۆنواهندانی مۆکل داتگ که درگوز به انت یا هۆنبها لۆٹ انت، ما اے راه ءَ نه بند اێں. الله پاک ءَ درائێنتگ: «و لکم فی القصاص حیاة یا اولی الألباب» ءُ هست شمے واستا بێر ءِ ته ءَ برابرێں زندگی ئے اے دانایاں.
🔹هلوچگر گدّارے؛ کسے په گدار ءِ رکێنگ ءَ سۆگه مه کنت/ هلوچگری په وتی وامانی گرگ ءَ هم شرع ءُ کانود ءِ رد ءَ حرام ءُ مکن بوتگ؛ وتی مسائل ءُ مشکلاں شه شریعت ءُ کانود ءِ رد ءَ رندگیری کن ات
زاهدان ءِ آدێنگ ءِ امام ءَ درشان کرت: اگه هلوچگرے دزگر بیت هچ کس پرایی واستا سۆگه مه کنت، پچےکه هلوچگر گدارے ءُ الله پاک ءَ وتی رسول ءَ پرمائێنتگ: «و لا تکن للخائنین خصیما» ءُ مه بو گدارانی خاطر ءَ جێڑه کنۆک.
واجه ءَ گێش کرت: مچێن هلوچاں آجو کن ات ءُ په وتی وامانی گرگ ءَ هم مردماں اسیر مه کن ات، چیا که اے کار شرع ءُ کانود ءِ رد ءَ مکن بوتگ. همےرنگ اے بابت ءَ تیوگێں ٹکاں تاوان دیستگ هاسێں ٹکے ءِ نام گرگ مه بیت ءُ پهکاں په دێمداری شه اے رڈێں پدرائشت ءَ کۆشست کن انت.