شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (23 مرداد 1405/ 14 اگست 2026) یکے شه هلاکه ءِ کارمسترانی گپانی بابت ءَ گوشت که آئی گپانی فیصله ءَ په الله ءُ مردماں هل آں. واجه ءَ هلاکه ءُ ملک ءِ مشکل ءُ سکیانی سوب ءَ «ترندی» زانت ءُ کڈن ئی کرت: آ کارمستراں که شه بنجاه ءَ په سیستانءُبلوچستان ءَ دێم دیگ به انت بائد میانهرو ءُ دورچارێں مردم به انت که گۆں ڈیه ءِ دۆدمان ءَ درستی به انت ءُ اد ءِ مردمانی حرمت ءُ جاگه ءَ سات انت.
زاهدان ءِ آدێنگ ءِ امام ءَ سێمی هپتگ ءَ هم په دێمداری شه هلوچگری ءَ کڈن کرت که اے وڑێں هلوچگری ماں ڈیه ءِ گوست ءَ نه بوتگ ءُ هلوچگر ءُ دزانی په ترندی ڈاه دات.
🔹ما را الله ءُ مردمانی فیصله بس انت/ شه وڑوڑێں مردمانی عادلانه ئێں فیصله ءَ منتوار آں
په سنیآنلاین ءِ سرهال ءَ مولانا عبدالحمید گوشت: آ هبراں که (شه هلاکه ءِ کارمسترے ءِ نێمگ ءَ) گوشگ بوت انت، پهکێں مردمانی دیدانک همێش ات که آئی مولءُمراد همے تریبون (زاهدان ءِ اهلسنتانی تریبون) بوتگ. من پێسر ءَ مدام شه همے منبر ءَ گوشتگ که بنڈ/ بهتاماں پسو دےآں بلے بدگوشاں پسو نه دےآں. من اے بنگپ ءَ په الله ءُ مردماں هل آں.
واجه ءَ دێمتر ءَ شه مردمانی پدگرد ءُ گڑتیاں اے بنگپ ءِ باروا دزبندی کرت ءُ گوشت ئی: من اد ءَ شه هلاکه ءِ ته ءِ ءُ ڈن ءِ تیوگێں مردماں مردێں ءُ جنێں، شیعه ءُ سنیاں، پاگواجه ءُ اسپےریش ءُ زانشتجاهی ءُ وڑوڑێں پاٹیاں که اے بابت ءَ وتی گڑتیاں درشان اش کرت ءُ عادلانه ئێں راهبری اش کرت، دزبندی ءُ پراوان دعای خیر کن آں.
واجه ءَ گێش کرت: په من الله ءُ مردمانی راهبری ءُ فیصله بس انت، من شه وت ءَ دێمپانی نه کن آں ءُ شه اے تریبون ءَ وتی جند ءِ مسائلانی بابت ءَ پسو نه دےآں. مئے کۆشست مدام همے بوتگ که مردمی به آں ءُ مردمانی میانجین ءَ زند گوازێن آں. هچکس ءِ حق ءَ پادمالی نه کن آں ءُ هچکس ءِ بدگوشی ءَ نه کرتگ آں. منی شرگداریاں مدام سازنده ءُ گۆں توجیل ءَ همراه بوتگ انت.
🔹درێں مردماں په تاهیر ءِ ساتگ ءَ سۆگه کن آں/ پهکان بائد په امنیت ءِ پهازگ ءَ کۆشست کن انت
زاهدان ءِ آدێنگ ءِ امام ءَ درائێنت: شما درێں مردماں سک سۆگه کن آں که تاهیر ءَ دار ات، پچےکه ملک ءِ جاور نگێگ انت ءُ ڈیه ءَ تاهیر پکار انت. پهکان بائد په تاهیر ءِ پهازگ ءَ کۆشست کن انت. هلاکه ءُ ملک ءِ مردماں اے حق ءَ کارمسترانی سر ءَ دار انت که آوان وتی اگده ءِ رد ءَ کرد کن انت. گڑا ما ودار اێں که بنجاه ءِ کارمسترانی شور چه بیت.
🔹آ کارمستراں که شه بنجاه ءَ په سیستانءُبلوچستان ءَ دێم دیگ به انت بائد دورچارێں مردم به انت که گۆں ڈیه ءِ دۆدمان ءَ درستی به انت ءُ مردمانی سر ءَ زۆراکی مهکن انت
شیخالاسلام ءَ درشان کرت: ترندی ءَ ماں هلاکه ءُ ملک ءَ پسو نهداتگ ءُ نهدنت. بازێنے شه ملک ءِ مشکلانی سوب لهتے مردمانی ترندی انت ءُ بازێنے شه اے ترندیانی تاواناں اے هلاکه ءِ مردماں رستگ، پچےکه ادا وڑوڑێں راج ءُ مذهباں زند گوازێن انت.
واجه ءَ گێش کرت: سیستانءُبلوچستان ءِ شیعه ءُ سنیاں گۆں وت ءَ سیادی دار انت، پمێشا تروندی ماں اے هلاکه ءَ هچبر پسو نه دنت، بلکه تهنا اعتدال، درایت، میانهروی، دورچاری ءُ حرمتانی دارگ پسو دنت. پمێشا من گوست ءَ هم همێشرا لۆٹتگ که آ کارمستر ءُ سرمستراں که اے هلاکه ءَ دێم دیگ به انت، بائد دورچارێں مردم بهانت که گۆں ڈیه ءِ دۆدمان ءَ درستی به انت ءُ مردمانی سر ءَ زۆراکی مه کن انت.
🔹آوان که په باج ءِ لۆٹگ ءَ هلوچاں سزا دے انت شه انسانیت ءَ بۆ ئے نه دار انت
مولانا عبدالحمید گۆں اشاره به هلوچگریاں گوشت: هلوچگری، راهبندی، باج ءِ لۆٹگ ءُ مردمانی هلوچ کنگ ءُ سزا دیگ گۆں اسلام ءِ هێلاں چپ انت ءُ مچێں مردمانی دلپدرد کرتگ. وهدےکه ما هلوچانی گرێوگ ءُ نالگاں گند اێں که په باج ءِ لۆٹگ ءَ آواں سزا دےات ءُ تامراں په آوانی کهولاں دێم دےانت ءُ بازێں زر لۆٹ انت، ما سک دلپدرد ءُ دلگران به اێں. آوان که چۆشێں کار کن انت، مسلمانی که هچ، بلکه شه انسانیت ءَ هم بۆ ئے نه دار انت.
واجه ءَ درائێنت: اے وڑێں هلوچگری ماں ڈیه ءِ گوست ءَ نه بوتگ. ما اے گپاں جن اێں که شه مردمانی حقاں دێمپانی کن اێں، بائد شه آ مردماں که چۆشێں کپ جن انت، دزبندی کن ات.
شیخالاسلام ءَ همےرنگ گوشت: من ایوک ءَ کارمستر یا یک هاسێں ادارهے ءَ گوں تران نه کرتگ ات، بلکێں من هم کارمستراں گۆں تران کرتگ که کانودی اهتیار ءُ آسرات دار انت ءُ هم پاگواجه ءُ اسپےریشاں گۆں تران کرتگ ءُ گوشتگ که هرکس هلوچگرانی پلهمرزی ءَ کنت دین ءُ استمان ءِ خیانت ءَ کرتگ ئی.
🔹هچکس هلوچگرانی نمازجنازه ءَ بهر نه زور ایت
مولانا عبدالحمید ٹکاٹک ڈاه دات: من مرۆچی ٹکاٹک گوش آں که اگاں هلوچگرے مر ایت، نه من آئی نمازجنازه ءَ بهر زور آں ءُ نه آدگه پاگواجه ءُ مردماں. آوان که مردمانی راهاں بند انت ءُ هلوچَ گر انت یا گۆں سلاه ءَ دزی کن انت، راهجن انت ءُ اگه کشگ به انت، هچکس آوانی نمازجنازه ءَ بهر نه زور ایت ءُ په آوانی کهولانی دلتسلایی ءَ نه رئوت.
🔹هلوچگراں ءُ دزاں هلوچاں آزات کن انت ءُ مردمانی زرءُمالاں پد ءَ دےانت، اگاں ناں ما ءُ مردم دستاں آسمان ءِ نێمگ ءَ چست کن اێں
زاهدان ءِ آدێنگ ءِ امام ءَ گڈسر ءَ ٹکاٹک گوشت: من هلوچگراں ءُ دزاں گوش آں که اگه شه همے مردمان ات ءُ سیادی ءِ امێت ءَ دار ات، گڑا هلوچاں آزات کن ات ءُ مردمانی زرءُمالاں پد ءَ بدےات؛ شمے حرمت همے کساس انت. اگاں په رزق ءُ رۆزی ءَ ترس ات سوگند انت که الله پاک شما را رۆزی دنت. راست انت که ما مالزانشت ءِ باروا کارمسترانی شرگداری ءَ کن اێں که مالزانشت نگێگ انت، بلے اگه کسے په ستک کار ءُ دندا ءِ پد ءَ بیت ماں چاگرد ءَ کارءُ دندا باز انت.
واجه ءَ درائێنت: ما گوستگێں هپتگ ءَ هلوچگراں ڈاه دات که اگاں هلوچاں آجو مه کن انت آوانی بد دعایی ءَ کن اێں، بلے ما انگت امێت دار اێں که هلوچاں آجو کن انت ءُ آ زرءُمالاں که دز اتگ اش واتر کن انت، بلے اگه آوان اے کار ءَ مه کن انت گڑا ما دستاں آسمان ءِ نێمگ ءَ چست کن اێں ءُ آ وهداں الم الله ءِ هژم ءُ غضب ظالمانی سر ءَ اێر کێت.