شیخالاسلام مولانا عبدالحمید ماں زاهدان ءِ نمازجمعه ءِ دیوان ءَ (26 تیرماه 1405/ 17 جولای 2026)، ایران ءُ امریکه ءِ جنگ ءِ برجاہ دارگ ءُ اے جنگ ءِ «رۆشنێں باندات» ءِ نه بوگ ءِ سر ءَ وتی گڑتی ءُ اپسوز ءَ درشان کرت ءُ گوشت ئی که «مردمانی اوپار شه وتی زند ءِ جاوراں ھلاس بوتگ» ءُ شه کارمستراں لوٹ ات که آ «ملک ءِ سیاسی ءُ مالزانشتی سۆباں» گۆں دگه ملکے ءِ سۆباں بندۆک مه کن انت ءُ «بس ایران ءِ استمان ءِ بابت ءَ جێڑ انت.»
🔹مردمانی ٹوهترێں گڑتی ماں نونێں جاور ءَ «گرانی» انت
په سنیآنلاین ءِ سرهال ءَ مولانا عبدالحمید گوشت: ماں نونێں جاور ءَ ملک ءِ وڑوڑێں پاٹیانی ٹوهترێں گڑتی همێش انت که آ گرانیانی آماچ انت. ابید شه لهتے هاسێں مردماں که دست اش جاهے بند انت ءُ لپاش انت، آدگه پاٹیاں یا کمێں مڈی ئے دار انت یا هچ نه دار انت.
واجه ءَ گێش کرت: شه یک نێمگ ءَ زر ءِ بےارزشتی ءُ شه دگه نێمگ ءَ بازێں گرانیاں مردمانی سرێں پرۆشتگ. بازێں مردمے وتی گسانی وازمندیانی پوره کنگ ءُ نۆدربرانی هرچءُدرچ ءُ گس ءُ دکانانی کریهانی تیار کنگ ءِ وس ءَ نه دار انت.
🔹مردم په ترانکاریاں امێتوار ات انت؛ کارمستراں پسۆ دےانت کئے ءَ سهلنمدی ءَ پرۆشتگ؟
زاهدان ءِ آدێنگ ءِ امام ءَ درائێنت: بژن انت که جنگ انگت برجاه انت ءُ پرێشی هچ رۆشنێں بانداتے نێست. مردماں امێتوار ات انت که ترانکاریاں که بنگێج بوت ات انت ءُ دلار ءُ تنگه هم ارزان بوت ات، آسر ءَ رس ایت ءُ سهل بیت، بلے ما نه زان اێں کئے ءَ اے سهلنمدی ءَ پرۆشت.
واجه ءَ گێش کرت: کارمستراں بائد پسۆ دے انت که کئے ءَ اے سهلنمدی ءَ پرۆشت؟ بژن انت که مئے ملک ءِ رسانکدر که نام ئی «راجی» انت ءُ چۆناهی ءَ راجی ئے نه انت، مردماں شه جنگ ءِ گواچنێں هالاں سهیَ نه کنت.
مولانا عبدالحمید درشان کرت: ماں اے رۆچاں ملک ءِ زربار ءِ بندن ءُ بارڈراں که په آوانی جۆڑ کنگ ءَ میلیارد دلار هرچ بوتگ ءُ مردمانی کٹءُکار ءُ سۆداگری ءِ جاگه انت، آسگواری به انت. زرباری شهرانی پل ءُ بنیاتی ڈیلءُڈۆلاں هم ڈالێنگَ به انت که گرانێں تاوانے په ملک ءَ.
🔹مردمانی اوپار شه وتی زند ءِ جاوراں ھلاس بوتگ؛ تانسرپسندانی دێم گرگ بیت ءُ جوانێں توجیلے درگێج ات
زاهدان ءِ آدێنگ ءِ امام ءَ درشان کرت: آوان که گۆں سهل ءَ چپ انت پچے دور ءَ نه چار انت؟! لهتے «بێر» ءِ گپ ءَ جن انت؛ بێر شه وت ءَ وهدے دار ایت ءُ اوپار ئی پکار انت. ماں اے جاور ءَ که مردمانَ ناں په ورگ ءَ نێست ءُ زندمان اش سکیانی آماچ انت اے بنگپاں استمان ءِ تباهی ءِ سوب به انت.
واجه ءَ ٹکاٹک گوشت: اگاں تانسرپسندانی دێم گرگ مه بیت ءُ جوانێں توجیلے درگێجگ مه بیت، گڑا الله زانت که ملک ءِ آسر چۆن بیت، بلے ما اێشرا زان اێں که مردمانی اوپار شه وتی زند ءِ جاوراں ھلاس بوتگ.
🔹مهتر علی، مهتر حسن ءُ حسین رضیاللهعنهم «سهل ءِ امام» بوتگ انت
مولانا عبدالحمید درائێنت: لهتے گوش انت مهتر حسین ءَ گۆں یزید ءَ سهل نه کرت، گڑا ما پچے گۆں امریکه ءَ سهل کن اێں! مهتر حسن ءَ که مهتر علی ءِ زهگ ءُ شیعهانی باور ءِ رد ءَ «معصوم» انت ءُ رد نه کنت، گۆں مهتر معاویه ءَ سهل ئی کرت. مهتر حسین ءَ هم وهدےکه شه کوفیانی عهدپرۆشی ءَ سهی بوت یزید ءِ لشکر ءَ گوشت ئی که من جنگ ءَ نه لۆٹاں ءُ من ءَ مۆکل دےات مدینه ءَ برگرد آں. پمێشا مهتر حسین، مهتر حسن ءُ مهتر علی سهل ءِ امام بوتگ انت.
همےرنگ سهل ءُ ترانکاری قرآن ءِ حکم انت که گوش ایت: «وَإِنْ جَنَحُوا لِلسَّلْمِ فَاجْنَحْ لَهَا»؛ اگاں لێٹ ات انت په سهل ءِ واست ءَ گڑا تو هم به لێٹ په آئی. کسے نه توانت قرآن ءِ حکم ءِ چپ ءَ کرد کنت. واجه رسول الله صلیاللهعلیهوسلم ءَ گۆں مکه ءِ مشرکاں که آیرا شه مکه ءَ در اش کرتگ ات، هم سهل ئی کرت.
🔹لهتے دمگی کارمستراں بێر ءِ پد ءَ انت؛ اے زۆراں گۆں تپاک ءُ امنیت ءَ چپ انت
مولانا عبدالحمید ماں دگه بهرے شه وتی هبراں گۆں اشاره به سیاسی زۆر ءُ بێراں مسیت مکی ءِ پاٹی ءِ سر ءَ گوشت: ماں اے جاور ءَ که دشمن ءِ بالیگراباں ملک ءَ آسگواری کن انت، بژن انت که لهتے دمگی کارمسترانی جهد همێش انت که مسیت مکی ءِ پاٹی ءَ زۆر ءُ سکیانی آماچ کن انت.
واجه ءَ گێش کرت: عالم ءُ لهتے شه مسیت ءِ استاذاں که الله زانت په هچ کس ءَ تاوانے نه دار انت ءُ جێڑه ءِ پد ءَ هم نه بوتگ انت، دزگر ءُ درانڈیه اش کرتگ. مسیت مکی ءِ پوریاگر ءُ آوان که مسیت ءِ قلکاں شه شهر ءِ ته ءَ مچ کن انت، هم دزگر اش کرتگ که «درامد» انت. ما زبرَ زان اێں که درامد ءِ هبر نه انت، بلکه بێر ءُ زۆر ءِ هبر انت.
🔹په اتباع/درامد ءِ نیمون ءَ مزنێں ظلمے اے ڈیه ءِ مردمانی سر ءَ بوتگ
زاهدان ءِ آدێنگ ءِ امام ءَ گێش کرت: بازێں عالمے که په هورتێں بنگپانی نیمون ءَ مدام لۆٹائێنگ ءُ درانڈیه بوتگ انت، همے ایران ءَ ودی بوتگ انت ءُ شه همے ٹکاں انت که همدا زند گوازێن انت ءُ پِس ءُ پیرکان اش همدا زند گوازنێنتگ.
واجه ءَ ٹکاٹک گوشت: اپسۆز انت که په درامد ءِ نیمون ءَ مزنێں ظلمے اے ڈیه ءِ مردمانی سر ءَ بوتگ. دهاں هزار مردم ءَ شه سرکاری هزمتاں زبهر اش کرتگ که اے کردانی منانک بس سیاسی زۆر بوتگ.
🔹بازێنے شه «هۆنێں جمعه» ءِ منگنامه ءِ بنداں اێر دارگ نه بوتگ انت
مولانا عبدالحمید گوشت: پد شه زاهدان ءِ هۆنێں جمعه ءِ پێشامد ءَ هلاکه ءِ گێشتری کارمستراں بدل بوت انت، بلے لهتے کارمستراں انگت هست انت. هۆنێں جمعه ءِ منگنامه ءِ باروا لهتے مسائل انت که من انگت نه گوشتگ آں ءُ شاید آیوک ءَ بگوش آں اش.
واجه ءَ گێش کرت: آ وھد ءَ ما مردمانی دزبندی کرتگ ات که په رکگ شه ناامنی ءَ اے منّگنامه ءَ منّ انت. منگنامه منگ ءُ ڈیه ءِ امنیت جۆڑ بوت، بلے بژن انت که آئی بازێں بندے اێر دارگ نه بوت انت ءُ ما زان اێں که کئے ءَ گۆں اے منگنامه ءِ اێر دارگ ءَ چپ انت.
🔹هلاکه ءِ شورای تأمین تانسرپسندانی دێم ءَ گیت
زاهدان ءِ آدێنگ ءِ امام ءَ وتی هبرانی گڈسر ءَ کڈن کرت: ما اے ڈیه ءِ جاهی نندۆک اێں ءُ جاور ءَ جوان سرپد اێں. ڈیه ءِ مردماں زۆر ءِ مۆکل ءَ نه دےانت. من شه هلاکه ءِ شورای تأمین ءَ لۆٹ آں که اے بنگپ ءَ رندگیری کنت ءُ تانسرپسندانی دێم ءَ گیت، پچےکه اے کردار ءُ زۆراں گۆں تپاکی ءَ چپ انت ءُ په امنیت، یکویی ءُ براسی ءَ هچ کمکے نه کن انت.