ملک ءِ رکێنگ ءِ گهترێں توجیل «ترانکاری» انت

شیخ‌الاسلام مولانا عبدالحمید ماں زاهدان ءِ نمازجمعه ءِ دیوان ءَ (19 تیرماه 1405/ 10 جولای 2026) گۆں اشاره به جنگ ءِ گرانێں تاواناں په ملک ءَ ءُ ایران ءِ مردماں ترانکاری ءَ گهترێں توجیل په ملک ءِ رکێنگ ءَ زانت ءُ شه کارمستراں لۆٹ ات که گۆں ته ءِ ءُ ڈن ءِ سیاستانی ٹگلێنگ ءَ دری مشکلاں گیشءُگیوار کن انت ءُ ته ءِ بازێں جێڑهاں هم رندگیری به انت.

🔹گرانیاں مردمانی سرێن ءَ پرۆشتگ

په سنی‌آنلاین ءِ سرهال ءَ مولانا عبدالحمید درشان کرت: بژن انت که گرانی ملک ءِ ته ءَ باز بوتگ ءُ مردمانی سرێنانی پرۆشتگ. نونێں جنگانی تاوان شه گوست ءِ جنگاں سک باز انت. پمێشا ما مدام ڈاه داتگ که ملک ءَ جنگ ءِ آماچ مه کن ات، چیا که ملکے که دێر انت بندشانی آماچ بوتگ، اۆدا جنگ گرانی ءُ تاواناں گێش کنت ءُ مردم هم گێشتر رنج ءُ سکیانی آماچ به انت.

🔹جنگ ءِ مالزانشتی تاواناں په ایران ءَ شه دگه ملکاں باز گشتر بوتگ انت

واجه ءَ گێش کرت: اے جنگ ءَ په دوئێں ملکاں ءُ همےرنگ په همسایگێں ملکاں گرانێں تاوان داشتگ، بلے مئے ملک ءُ استمان ءِ تاواناں شه آدگه ملکانی تاواناں باز گێشتر بوتگ انت. اے جنگ ءَ په پهکێن ملکاں تاوان داشتگ پچےکه پارسء مزن‌هور که دنیا ءِ مالزانشتی شاهراه انت بند بوتگ، پمێشا تیوگێں ملکاں گرانی ءِ آماچ بوتگ انت، بلے مئے ملک ءَ گێشتر تاوان دیستگ.

زاهدان ءِ آدێنگ ءِ امام ءَ درائێنت: ماں اے جنگ ءَ هۆر گۆں جانی تاواناں ملک ءِ سلاهبندی ءُ مالزانشتی ڈیلءُڈۆلاں نشانگ ءُ بێران بوت انت. اے ڈیلءُڈۆلاں ایران ءِ مردمانی مڈی بوتگ انت. من استمان ءِ اے جانی ءُ مالی تاواناں دل‌تسلایی گوش آں، هاسکار مزن‌رهشۆن ءِ مرک ءَ آیی زهگ ءُ دۆزواهاں دل‌تسلایی گوش آں.

🔹مارشتاں کارمرز کنگ مه بنت؛ ایران ءِ مردماں گێشترێں تاواناں سگ ات نه کن انت

مولانا عبدالحمید دێمتر ءَ کڈن کرت که جێڑهاں گۆں ترانکاری ءَ گیشءُگیوار بنت ءُ گوشت ئی: منی سۆگه په کارمستراں همێش انت که جێڑهاں گۆں ترانکاری ءَ گیشءُگوار کن ات. گهترێں توجیل په ملک ءِ رکێنگ ءُ پهازگ ءَ ترانکاری انت. آوان که لۆٹ انت جێڑهاں گۆں ترانکاری ءَ گیشءُگیوار کن انت نه بائد شه تانسرپسندانی نێمگ ءَ بدگوشی اش بیت.

واجه ءَ ٹکاٹک گوشت: نه بائد مارشتاں کارمرز به انت. لهتے «بێر» ءِ گپ ءَ جن انت؛ بێر وهدے دار ایت ءُ اۆپار لۆٹ ایت. گهترێں بێر همێش انت که هرچیز ءَ په الله پاک ءَ به هل اێں ءُ گێشترێں تاوان ءُ نقصان ءِ دێم ءَ بگر اێں؛ پچےکه ملک ءُ ایران ءِ مردماں گێشترێں تاواناں هاسکار ماں مالزانشتی پڑا سگ ات نه کن انت.

🔹دشمناں لۆٹ انت ایران ءَ گۆں اسلامی ملکاں جنگ دےانت؛ کارمستراں گۆں سیاستانی ٹگلێنگ ءَ ته ءِ ءُ ڈن ءِ جێڑهاں گیشءُگیوار کن انت

زاهدان ءِ آدێنگ ءِ امام ءَ گڈسر ءَ کڈن کرت: دشمناں لۆٹ انت ایران ءُ اسلامی ملکانی میانجین ءَ که گوت دێرێں رهوت اش هست، جنگ جۆڑ کن انت؛ پهکان بائد په‌سار به انت. مئے ملک ءِ کارمستراں گۆں سیاستانی ٹگلێنگ ءَ هم وتی جێڑهاں گۆں دری ملکاں ءُ هم گۆں همسائگاں گیشءُگیوار کن انت ءُ همےرنگ آ بازێں ناوشنودێں مردمانی جێڑهاں رندگیری کن انت که ماں دگاں زهرشانی اش کرت ءُ کشگ بوت انت. مردمانی لۆٹانی منگ ٹوهترێں حکمت ءُ درایت انت. همےرنگ ماں اے جاور ءَ گهترێں راه همێش انت که سیاسی بندیگاں آجو کن ات ءُ گپان اش گۆش دار ات.